डेभ्यु खेलमा मेस्सीको निर्णायक गोल

काठमाडौँ । लियोनेल मेस्सीले डेभ्यु खेलमा गोल गर्दै इन्टर मियामीलाई जित दिलाएका छन् ।

शनिबार बिहान सम्पन्न खेलमा मेस्सीले खेलको ५४औ मिनेटमा मैदान प्रवेश गर्दै इन्टर मियामीका लागि डेभ्यु गरेका थिए । लिग कप अन्तर्गत मेक्सिकन क्लब क्रुज अजुलविरुद्धको यो खेल इन्टर मियामीले २-१ ले जितेको छ ।

मेस्सीले खेलको ९४औँ मिनेटमा फ्रीकिक मार्फत निर्णायक गोल गर्दै इन्टर मियामीलाई जिताएका थिए । यसअघि खेलको ४४औँ मिनेटमा रोबेर्ट टेलरले इन्टर मियामीका लागि गोल गरेका थिए भने खेलको ६५औँ मिनेटमा उरिएल अनटुनाले क्रुजका लागि बराबरी गोल गरेका थिए ।

अब लिग कप अन्तर्गत दोस्रो खेलमा इन्टर मियामीले आगामी जुलाई २६ मा एटलान्टा युनाइटेडसँग खेल्ने छ ।