सभामुख छाडेका बाबुरामलाई मन्त्री पद उपहार

काठमाडौँ । कोशी प्रदेशको सरकार गठनका लागि सभामुख पदबाट राजीनामा दिएका बाबुराम गौतम मन्त्री बन्ने भएका छन् । मंगलबार सभामुख पदबाट राजीनामा दिएका गौतमलाई नेकपा माओवादी केन्द्रले मन्त्री बनाउने भएको हो ।

स्रोतका अनुसार उद्धव थापा नेतृत्वको सरकारमा उनलाई आर्थिक मामिला तथा योजना मन्त्रालयको जिम्मेवारी दिने तयारी छ । मुख्यमन्त्री पछि दोस्रो वरियतामा रहने गरी गौतमलाई मन्त्री बनाउन लागिएको बताइन्छ ।

सभामुखको राजीनामा गराएर बहुमत जुटाएपछि मंगलबार नियुक्त भएका मुख्यमन्त्री थापाले आज पद तथा गोपनीयताको शपथग्रहण गर्दैछन् । आजै सरकार साझेदार दलबाट सहभागी हुने मन्त्रीले पनि शपथग्रहण गर्नेछन् । अहिले गठबन्धन दलको बैठक बसेर मन्त्रालयको टुंगो लगाइनेछ ।