साम्बा सम्मिलित रानाना सेमिफाइनलमा पराजित

काठमाडौं । नेपाली राष्ट्रिय फुटबल टोलीकी स्टार खेलाडी सावित्रा भण्डारी ‘साम्बा’ सम्मिलित हापोएल रानाना महिला फुटबल क्लब इजरायलको एथेना कपको सेमिफाइनलमा पराजित भएको छ ।

बिहीबार राती भएको सेमिफाइनल खेलमा किर्यात गातसँग पराजित भएपछि रानानाको फाइनलको सपना चकनाचुर भएको हो ।

इजरायलको लिग च्याम्पियन किर्यात गातले ३-० को सहज जित दर्ता गर्दै फाइनलमा स्थान पक्का गर्यो । नेपाली फरवार्ड साम्बाले बलियो प्रतिद्वन्द्वीविरुद्ध केहि अवसर पाएपनि विपक्षी गोलरक्षक बाधक बन्दा गोल गर्न सकिनन् ।

यसअघि रानानाको लागि डेब्यु खेलमा सावित्राले १ गोल र १ असिस्ट गर्दै टोलीलाई २-० को जित दिलाएकी थिइन् । अब रानानाले अर्को बिहीबार लिग अन्तर्गत पहिलो खेल खेल्नेछ ।