बेलिङघमले ९५ मिनेटमा गोल गर्दा रियल म्याड्रिड विजयी

काठमाडौँ । स्पेनिस ला लिगा अन्तर्गत रियल म्याड्रिडले गेटाफेमाथि रोमान्चक जित हासिल गरेको छ । रियल म्याड्रिडलाई जुडे बेलिङघमले खेलको इन्जुरी समयमा गोल गर्दै जिताएका हुन् ।

बेलिङघमले यस सिजनको ला लिगामा ४ खेलमा पाँच गोल गरेका छन् । उनी अहिलेसम्म यस सिजनको ला लिगामा सर्बाधिक गोल गर्ने खेलाडी हुन् । यसअघि रियलका लागि खेलको ४७औ मिनेटमा जोसेलुले गोल गर्दै खेल बराबरी गरेका थिए । त्यस्तै गेटाफेका लागि खेलको ११औं मिनेटमा बोर्जा मेयोरालले गोल गरेका थिए ।

यो जितपछि रियल म्याड्रिडले यस सिजनमा लगातार चार खेलमा जित हासिल गरेको छ । यो जितपछि रियल म्याड्रिडको ४ खेलमा १२ अंक भएको छ र लिगमा शिर्ष स्थानमा रहेको छ । त्यस्तै गेटाफेको भने यस सिजनमा यो दोस्रो हार हो । यो खेलपछि गेटाफेको ४ खेलमा ४ अंक भएको छ र लिगमा १४औं स्थानमा झरेको छ ।