जर्जियाविरुद्ध स्पेनको ७ गोल, क्रोसिया र पोर्चुगल पनि विजयी
मकालु खबर
काठमाडौँ । युरोकप छनौट अन्तर्गतको खेलमा स्पेनले जर्जियाविरुद्ध गोलको वर्षा गरेको छ । गएराती सम्पन्न खेलमा स्पेनले जर्जियाविरुद्ध ७-१ गोल अन्तरले जित हासिल गरेको हो ।
स्पेनको जितमा अल्भारो मोराटाले ह्याट्रिक गरेका थिए । त्यस्तै डानी ओल्मो, निको विलियम्स, लामिने यमलले एक एक गिल गरेका थिए भने एक गोल जर्जियाका सोलोमों कुभिरभेलियाले आत्मघाती गोल गरेका थिए । त्यसैगरी जर्जियाका लागि एक गोल जिओर्जी चाकभेटाजेले गरेका थिए ।
यो जितसहित समूह ए मा रहेको स्पेनको यो युरोकप छनौटमा दोस्रो जित हो । यो जितपछि स्पेनको ३ खेलमा ६ अंक भएको छ र समूहमा दोस्रो स्थानमा रहेको छ । जर्जियाको भने यो दोस्रो हार हो । जर्जियाको ४ खेलमा ४ अंक रहेको छ र समूहमा चौथो स्थानमा छ । स्पेनले अब अर्को खेल सेप्टेम्बर १३ मा साइप्रसविरुद्ध खेल्ने तालिका रहेको छ ।
समूह ए कै अर्को खेलमा स्कटल्याण्डले साइप्रसलाई ३-० गोलले पराजित गरेको छ । स्कटल्याण्डलाई जित दिलाउन स्कट म्याकटोमिने, रायान पोर्टुइयोस र जोन म्यागिनले गोल गरेका थिए ।
युरोकपको छनोटमा अन्य खेलमा समूह डी मा रहेका क्रोसियाले ल्याटिभालाई ५-० गोलले पराजित गर्दा सोही समूहमा रहेका टर्की र अर्मेनियाले एक एक गोलको बराबरी खेलेका छन् ।
समूह जे मा रहेको स्लोभाकियामाथि पोर्चुगलले १-० गोलले पराजित गर्दा सोही समूहको बोस्नीयाले लिचेस्टेनस्टेन माथि २-१ गोलको जित निकालेको थियो । त्यस्तै सोही समूहको अर्को खेलमा आइसल्याण्ड पराजित भएको छ । आइसल्याण्डलाई लग्जम्वर्गले ३-१ गोलले पराजित गरेको छ ।
मकालु खबर
