म्यानचेस्टर सिटीको शतप्रतिशत जित, अरु कुन क्लब भए विजयी ?

काठमाडौँ । ईङलिश प्रिमियर लिग अन्तर्गत म्यानचेस्टर सिटीले वेस्टह्यामलाई पराजित गरेको छ । शनिबार सम्पन्न खेलमा म्यानचेस्टर सिटीले वेस्टह्यामलाई ३-१ गोल अन्तरले पराजित गरेको हो । पहिलो हाफमा १-० ले पछि परेको सिटीले खेलको दोस्रो हाफमा कमब्याक गर्दै ३ गोल गरेको थियो ।

सिटीका लागि जेरेमी डोकु, बेर्नार्डो सिल्भा र इर्लिंग हालाण्डले एक एक गोल गरेका थिए । त्यस्तै गरि वेस्टह्यामका लागि जेम्स वार्ड प्रोवजले एक गोल गरेका थिए । यो जितपछि म्यानचेस्टर सिटीले लिगमा शतप्रतिशत जित निकाल्दै ५ खेलमा १५ अंक बनाएको छ र लिगमा शिर्ष स्थानमा कायम रहेको छ ।

अर्काे खेलमा लिभरपुलले वोल्भ्सलाई ३-१ गोल अन्तरले पराजित गरेको छ । लिभरपुल १-० गोलले पछि परेपछि खेलमा दोस्रो हाफमा कमब्याक गर्दै ३ गोल गरेको थियो । लिभरपुलको जितमा कोडी गाक्पो र आन्ड्रेव रोबेर्टसनले एक एक गोल गरेका थिए । एक गोल वोल्भ्सका हुगो बुएनोले आत्मघाती गोल गरेका थिए । त्यसैगरी वोल्भ्सका लागि ह्वांग ही चानले एक गोल गरेका थिए । यो जितपछि लिभरपुलको ५ खेलमा १३ अंक भएको छ ।

घरेलु मैदान ओल्ड ताफोर्डमा सम्पन्न खेलमा ब्राइटनसँग म्यानचेस्टर युनाइटेड ३-१ गोल अन्तरले पराजित भएको छ । ब्राइटनको जितमा डानी वेलब्याक, पास्कल ग्रोब र जोआओ पेड्रोले एक एक गोल गरेका थिए । म्यानचेस्टर युनाइटेडका लागि एक गोल हान्निबल मेजब्रीले गरेका थिए । यस सिजनको लिगमा म्यानचेस्टर युनाइटेडको तेस्रो हार हो । यो हारपछि युनाइटेडको ५ खेलमा ६ अंक रहेको छ र लिगमा १२औं स्थानमा झरेको छ ।

टोटनह्यामले ९० मिनेटपछिको इन्जुरी समयमा २ गोल गर्दै खेल जितेको छ । यसअघि खेलको ७३औ मिनेटमा गुस्ताभो हामरको गोलमा अग्रता लिएको शेफिल्डले ९० मिनेटपछिको इन्जुरी समयमा दुई गोल खाएको थियो । टोटनह्यामका लागि खेलको ९८औं मिनेटमा रिचार्लिशन र १००औ मिनेटमा डेजान कुलुसेभ्सकीले गोल गरेका थिए । यो जितपछि टोटनह्यामको ५ खेलमा १३ अंक भएको छ र लिगमा दोस्रो स्थानमा उक्लिएको छ । शेफिल्डको भने यो हारपछि ५ खेलमा एक अंक रहेको छ र लिगमा १७औँ स्थानमा रहेको छ ।