ला लिगामा बार्सिलोनाको कमब्याक जित

काठमाडौँ । स्पेनिस ला लिगा अन्तर्गत बार्सिलोनाले सेल्टा भिगोमाथि जित हासिल गरेको छ । गएराती सम्पन्न खेलमा बार्सिलोनाले सेल्टा भिगोलाई ३-२ गोल अन्तरले पराजित गरेको हो ।

बार्सिलोनाको जितमा रोबेर्ट लेवानडोस्कीले २ गोल गरेका थिए भने जोआओ क्यान्सेलोले एक गोल गरेका थिए । २-० ले पछि परेको बार्सिलोनाले शानदार कम्ब्याक गर्दै जित हासिल गरेको थियो । २-० ले पछि परेको अवस्थामा खेलको ८१औं र ८५औ मिनेटमा लेवानडोस्कीले र खेलको ८९औं मिनेटमा क्यान्सेलोले निर्णायक गोल गर्दै बार्सिलोनालाई महत्वपूर्ण ३ अंक दिलाएका थिए ।

यसअघि सेल्टाका लागि जोर्गेन लार्सेन र एनास्तासियस डोउभिकसले एक एक गोल गरेका थिए । यो यस सिजनमा बार्सिलोनाको पाँचौं जित हो । यो जितपछि ६ खेलमा बार्सिलोनाको १६ अंक भएको छ र लिगमा शिर्ष स्थानमा उक्लिएको छ । त्यसैगरी सेल्टाको ६ खेलमा ४ अंक रहेको छ र लिगमा १७औं स्थानमा रहेको छ ।

यस खेलमा बार्सिलोनाका फ्र्यांकी डी जोंग घाइते भएका छन् । उनले खेलको ७२औं मिनेटमा मैदान छोडेका थिए । उनी कम्तिमा एक महिना मैदान बाहिर रहने बताइएको छ ।