सन्दीप लामिछानेले लिए राष्ट्रिय टिमबाट नाम फिर्ता

काठमाडौँ । नेपाली क्रिकेट टिमका महत्त्वपूर्ण सदस्य सन्दीप लामिछानेले आसन्न त्रिकोणात्मक टी २० क्रिकेट सिरिजबाट नाम फिर्ता लिएका छन् । घरेलु मैदानमा हुने प्रतियोगिता आउन केही समय बाँकी रहेका बेला सन्दीपले सामाजिक सञ्जालबाट प्रतियोगिता खेल्न नसक्ने भन्दै नाम फिर्ता लिएका हुन् ।

उनले सामाजिक सञ्जालमा लेख्दै तत्कालका लागि आफू कुनै प्रतियोगिता खेल्न नसक्ने अवस्थामा रहेको बताएका छन् । ‘भारी मन पार्दै आगामी प्रतियोगिताबाट नाम फिर्ता लिने निर्णय गरेको र अहिले जुन अवस्थाबाट आफू गुज्रिरहेको छु, त्यो जीवनको निकै कठिन र चुनौतीपूर्ण समय रहेको छ,’ उनले भनेका छन्, ‘मैले आफूलाई फेरी पुरानै अवस्थामा ल्याउन निकै आवश्यक रहेको र यो बेला परिवारलाई पनि समय दिनुपर्ने महसुस गरेको छु । अर्को भेट नभएसम्म सबैको आशीर्वाद र शुभकामनाका लागि कृतज्ञता व्यक्त गर्न चाहन्छु ।’

सर्वोच्चमा विचाराधीन रहेको सन्दीपको मुद्दाको अन्तिम सुनुवाइ बारम्बार सर्दै आएको छ । हिजोपनि सन्दीपको पेसीमा कुनै सुनुवाइ हुन सकेन । मानसिक रूपमा दबाबमा रहेका सन्दीप चीनमा भएको एसियन गेम्समा पनि मुद्दाकै कारण अन्तिम समयमा खेल्न पुगेका थिए । तर प्रतियोगितामा उनको प्रदर्शन खासै राम्रो हुन सकेको थिएन ।