हत्या आरोपमा समातिएका कृष्ण सेट्टीको मृत्यु

धनगढी । जिल्ला प्रहरी कार्यालय कैलालीको थुनामा रहेका एक युवकको मृत्यु भएको छ । हत्या आरोपमा पक्राउ परेर थुनामा राखिएका धनगढीका कृष्ण सेट्टीको मृत्यु भएको हो ।

जिल्ला प्रहरी कार्यालय कैलालीकाअनुसार थुनुवाको सेती अस्पतालमा मृत्यु भएको हो । धनगढी उपमहानगरपालिका-१६ बेहडाबाबा विद्यालय क्षेत्रमा बाँसको लाठी प्रहार गरेर ३८ वर्षीय लालबहादुर थापाको हत्या गरेको अभियोगमा सेट्टी पक्राउ परेका थिए ।

बिहीबार प्रहरीले उनलाई बयानका लागि थुनाकक्षबाट बाहिर ल्याएको थियो । प्रहरीले बयान लिने क्रममा बेहोस भएका ३१ वर्षीय सेट्टीको सेती प्रादेशिक अस्पतालमा उपचारका क्रममा मृत्यु भएको हो । सोमबार दिउँसो मदिरा चोरीको आरोप लगाएर स्थानीय व्यापारीसमेत रहेका सेट्टीले थापालाई बाँसको लाठी प्रहार गरेका थिए ।