राष्ट्रिय सभा निर्वाचनका लागि चिह्न प्रदान(सूचिसहित)
मकालु खबर
काठमाडौँ । राष्ट्रिय सभा सदस्य निर्वाचनका लागि राजनीतिक दललाई चुनाव चिह्न प्रदान गर्दै क्रम निर्धारण गरिएको छ ।
निर्वाचन आयोगले दर्ता भएका १२ वटा दलहरूका लागि २०७९ सालको प्रतिनिधिसभा सदस्य निर्वाचनमा समानुपातिक निर्वाचन प्रणालीतर्फ प्राप्त गरेको मतको आधारमा क्रम निर्धारण गरी निर्वाचन चिह्न प्रदान गरिएको हो ।
प्रवक्ता शालिग्राम शर्मा पौडेलले जारी गरेको विज्ञप्तिमा एमालेको सूर्य चिह्न पहिलो नम्बरमा परेको छ भने त्यसपछि कांग्रेसको रुख दोस्रो, माओवादी केन्द्रको गोलाकारभित्रको हँसिया हथौडा तेस्रो र चौथोमा राप्रपाको हलो चिह्न रहेका छन् ।
यस्तै त्यसपछि क्रमशः जसपाको ढल्केको छाता, जनमत पार्टीको लाउड स्पिकर, नेकपा एकीकृत समाजवादीको कलम, नागरिक उन्मुक्ति पार्टीको पिँध भएको ढकिया, लोसपाको साइकल, नेमकिपाको मादल, जममोर्चाको गिलास र नेपाल समाजवादी पार्टीको खुलेको एक आँखा रहेका छन् ।
राष्ट्रियसभाको निर्वाचन माघ ११ गते हुँदैछ ।
मकालु खबर
