एस्टन भिल्लाविरुद्ध २ गोलले पछि पारेको म्यानचेस्टर युनाइटेडले उल्ट्यायो नतिजा

काठमाडौँ । ईङलिश प्रिमियर लिग अन्तर्गत म्यानचेस्टर युनाइटेडले एस्टन भिल्लामाथि रोमाञ्चक जित हासिल गरेको छ । गएराती सम्पन्न खेलमा म्यानचेस्टर युनाइटेडले एस्टन भिल्लालाई ३-२ गोल अन्तरले पराजित गरेको हो ।

म्यानचेस्टर युनाइटेडको जितमा रासमस होजलण्डले निर्णायक गोल गरेका थिए । पहिलो हाफमा २-० गोल अन्तरले पछि परेको युनाइटेडले खेलको दोस्रो हाफमा कमब्याक गर्दै जित निकालेको थियो । म्यानचेस्टर युनाइटेडका लागि शुरुवाती दुवै गोल अलेजान्द्रो गार्नाचोले गरेका थिए ।

यसअघि पहिलो हाफमा एस्टन भिल्लाका लागि जोन म्याकगीन र लीन्डर डेनडोंकरले एक/एक गोल गरेका थिए । यो म्यानचेस्टर युनाइटेडको यस सिजनको १०औं जित हो ।

यो जितपछि १९ खेलमा ३१ अंक रहेको म्यानचेस्टर युनाइटेड लिगमा छैटौं स्थानमा उक्लिएको छ । एस्टन भिल्लाको भने यो यस सिजनमा चौथो हार हो । १९ खेलमा ३९ अंक रहेको भिल्ला लिगमा तेस्रो स्थानमा रहेको छ ।