जापान एयरलाइन्सको विमान अवतरणका क्रममा रनवेमै आगलागी

काठमाडौँ । जापानको राजधानी टोकियोस्थित हानेदा विमानस्थलमा विमान अवतरण गर्ने क्रममा आगलागी भएको छ ।

स्थानीय समय अनुसार साँझ ६ बजे जापान एयरलाइन्सको एक यात्रुवाहक विमानमा आगलागी भएको हो ।

जापान एयरलाइन्सको विमान अवतरणका क्रममा रनवेमै कोस्ट गार्डको विमानसँग ठोक्किएपछि आगलागी भएको समाचार एजेन्सी एनएचकेले बताएको छ ।

एयरलाइनले दिएको पछिल्लो जानकारी अनुसार विमानमा सवार रहेका सबै ३६७ यात्रु र १२ चालक दलका सदस्यहरूलाई विमानबाट बाहिर निकालिएको छ ।

समाचार एजेन्सीका अनुसार फिक्स्ड–विंग कोस्ट गार्ड विमानको चालक दलका एक सदस्य सो विमानबाट बाहिर निस्किन सफल भएपनि अन्य पाँच जना भने सम्पर्कविहिन रहेको बताइएको छ ।

एनएचकेका अनुसार दुर्घटनामा परेको कोस्ट गार्डको विमान सोमबार जापानमा गएको शक्तिशाली भूकम्पपछि आपूर्तिहरू पुर्याउन पश्चिमी जापानतर्फ गइरहेको थियो ।