४ फिल्म अलपत्र परेपछि ‘खजुरे ब्रो’बाट डेब्यु गर्दै नीति

काठमाडौँ । सुरज सुनुवारको निर्देशनमा निर्माण हुन लागेको चलचित्र खजुरे ब्रो को अफिसियल निर्माण घोषणा गरिएको छ ।

फिल्मको छायांकन केहि दिन अगाडि नै सुरु भएपनि निर्माण टिमले माघे संक्रान्तिको अवसरमा सोमबार एक कार्यक्रम आयोजना गर्दै अफिसियल घोषणा गरेको हो ।

फिल्म धरानका चर्चित व्यक्ति खजुरे ब्रो बाट प्रभावित रहेको निर्देशक सुनुवारले बताए । फिल्मको कथा पनि निर्देशक सुनुवारले नै लेखेका हुन् । फिल्मको मुख्य पात्रमा रेयर राईले अभिनय गर्नेछन् ।

यहि फिल्मबाट मोडल नीति शाहले डेब्यु गर्दैछिन् । यस अगाडि ४ फिल्म साइन गरेपनि निर्माण अलपत्र परेपछि नीति अन्यौलमा थिइन् । अन्तत उनको डेब्यु खजुरे ब्रो बाट हुने भएको छ ।

चलचित्रमा रेयर र नीतिका अलवा महेश त्रिपाठी, नविन मानन्धर, प्रकाश भुजेल, बिनिता थापा मगर, सुष्मा निरौला, पुस्कर कार्की, मनिष राउत, प्रेम सुब्बा र सुजाता राई लगायतका कलाकारको अभिनय रहनेछ ।

चलचित्रलाई नवीन मानन्धर र सुरज सुनुवारले निर्माण गर्न लागेका हुन् । फिल्मका कार्यकारी निर्माता डायमन्ड उप्रेती हुन् । चलचित्रको छायांकन इटहरी, धरान, दार्जिलिङ र काठमाडौँमा हुने जनाइएको छ ।