महेन्द्रनगरबाट काठमाडौँका लागि गुडेको बस कपिलवस्तुमा खस्यो : १० जनाको मृत्यु, ३० घाइते
मकालु खबर
काठमाडौं । कपिलवस्तुमा बस दुर्घटना हुँदा १० जनाको मृत्यु भएको छ भने चालकसहित ३० जना घाइते भएका छन् । गएराति १ बजे कपिलवस्तुको शिवराज नगरपालिका-१ सुरही पुल नजिकै बस दुर्घटना भएको हो ।
कञ्चनपुरको महेन्द्रनगरबाट काठमाडौँका लागि छुटेको सुनौलो महाकाली यातायातद्वारा सञ्चालित सुदूरपश्चिम प्रदेश ०२-००१ ख ००९८ नम्बरको बस गएराति करिब सवा १२ बजेतिर सडकबाट झण्डै डेढसय मिटर तल खसेर दुर्घटना भएको जिल्ला प्रहरी कार्यालय कपिलबस्तुका प्रहरी उपरीक्षक (एसपी) नवरत्न पौडेलले जानकारी दिए ।
उनकाअनुसार बस सडकबाट भीर हुँदै स्थानीय सुरही खोलामा खसेको छ । घटनास्थल चन्द्रौटाबाट पश्चिम तर्फ पर्छ । घाइते ३० मध्ये ९ जनालाई उपचारका लागि बुटवल रिफर गरिएको छ । अन्यको सञ्जीवनी र आधारभूत अस्पतालमा उपचार भइरहेको एसपी पौडेलले बताए । बसमा ४० यात्रु सवार सवार रहेको बताइएको छ ।
जिल्ला प्रहरी कार्यालय कपिलवस्तुका अनुसार मृतकको सनाखत हुन सकेको छैन । ब्रेक फेल हुँदा बस सडकबाट खसेको हुनसक्ने अनुमान छ ।
मकालु खबर
