बागमती प्रदेशस्तरीय राष्ट्रपति रनिङ सिल्डको उपाधि काठमाडौँलाई

काठमाडौँ जिल्लाले १४ औँ बागमती प्रदेशस्तरीय राष्ट्रपति रनिङ सिल्ड खेलकुद प्रतियोगिताको उपाधि जितेको छ।

विभिन्न १३ जिल्लाको सहभागितामा विभिन्न ६ खेल समावेश प्रतियोगितामा काठमाडौँ ३१ स्वर्ण, १२ र ९ कांस्यसाथ समग्रमा मंगलबर टिम च्याम्पियन बनेको काठमाडौँ जिल्ला खेलकुद विकास समितिका अध्यक्ष गणेशलाल कक्षपतिले जनाए । काठमाडौँ लगातार तेस्रोपटक च्याम्पियन बन्दै रनिङ सिल्ड आफ्नो नाममा लेखाउन सफल भयो।

प्रदेश खेलकुद विकास परिषद्, बागमती प्रदेशद्वारा आयोजित प्रतियोगितामा १० स्वर्ण, ६ रजत र १३ कांस्य जितेको चितवन दोस्रो भयो । तेस्रो स्थानको ललितपुरले ५ स्वर्ण, ४ रजत र ६ कांस्य हात पार्‍यो ।

जम्मा ६६ स्वर्णका लागि भएको प्रतिस्पर्धामा मकवानपुर र भुक्तपुरले समान ४–४, धादिङ, दोलखा, काभ्रे, सिन्धुली र नुवाकोटले समान २–२ तथा रामेछाप र सिन्धुपाल्चोकले समान १–१ स्वर्ण जिते ।

विजेतालाई प्रदेश खेलकुद विकास परिषद्, बागमती प्रदेशका सदस्य–सचिव सूर्यलाल भण्डारीलगायतले एक कार्यक्रमबीच पुरस्कृत गरे । यसै प्रतियोगिताबाट राष्ट्रिय खेलकुद परिषद्को आयोजनामा काठमाडौँमा हुने १४ औँ केन्द्रस्तरीय राष्ट्रपति रनिङ सिल्ड खेलकुद प्रतियोगिताका लागि बागमतीबाट खेलाडी छनोट हुने छन् । केन्द्रस्तरीय राष्ट्रपति रनिङ सिल्ड बैशाख ४ देखि ६ गतेसम्म हुनेछ ।