नेपालले जापानमा वाटा ओपन तेक्वान्दो खेल्ने

नेपालको तेक्वान्दो टिमले जापानमा हुने २० औं वाटा ओपन अन्तर्राष्ट्रिय तेक्वान्दो प्रतियोगितामा भाग लिने भएको छ ।

जापान वाटाको आयोजनामा हुने सो प्रतियोगितामा अल जापान तेक्वान्दो संघ र ओसाका तेक्वान्दो संघको सहयोग रहनेछ । नेपालका अन्तर्राष्ट्रिय तेक्वान्दो निर्णायक अशोक खड्काले २४ देशको सहभागिता रहने सो प्रतियोगितामा खेल्न १५ सदस्यीय नेपाली तेक्वान्दो टोली बिहिबार जापान प्रस्थान गर्ने जानकारी दिए ।

सो प्रतियोगितामा १३ औं दक्षिण एसियाली खेलकुद (साग) का स्वर्ण पदक विजेता वीरबहादुर महराले ७४ केजी मुनि, श्रीकृष्ण खड्काले ८७ केजी मुनि, निरज देउवाले ८७ केजी माथि, चन्द्रबहादुर राना मगरले ५८ केजी मुनि र धनबहादुर तामाङले ६८ केजी मुनि प्रतिस्पर्धा गर्नेछन् ।

यसैगरी टार्जन कायात मगर र युकेश थापा मगरले पुम्से यु ३० मा चुनौती पेश गर्नेछन् । महिलातर्फ सुस्मा श्रेष्ठले यु ६२ र सानी राना मगरले यु ७३ मा खेल्नेछिन् । भजिन्द्रबहादुर क्षेत्री पुरुष र विद्या राईले महिला प्रशिक्षकको जिम्मेवारीमा छन् ।

महेश्वर फुयालको नेतृत्वमा रहेको सो तेक्वान्दो टोलीमा टिम म्यानेजरमा रविन कोइराला र अफिसियलमा घनश्याम गौतम छन् । प्रतियोगतामा खड्काले रेफ्रीको भूमिका निर्वाह गर्नेछन् ।