रुसको सेन्ट पिटर्समा बस दुर्घटना : मृतकको संख्या ७ पुग्यो

एजेन्सी । रुसको सेन्ट पिटर्समा यात्रुवाहक बस नदीमा खस्दा ७ जनाको मृत्यु भएको छ ।

बस शुक्रवार राति नदीमा खसेर दुर्घटना भएको रुसी अनुसन्धान समितिले बताएको हो । घटना डाउनटाउन सेन्टमा भएको थियो । मोड मोड्ने क्रममा चालकले नियन्त्रण गुमाएपछि पुलबाट खसेर दुर्घटना भएको बताइएको छ ।

दुर्घटना हुँदा बसमा २० जना सवार थिए । रुसी आपतकालिन मन्त्रालयले यसअघि तीन जनाको मृत्यु भएको र चार जनाको अवस्था गम्भीर रहेको बताएको थियो ।

४४ वर्षीय चालकलाई नियन्त्रणमा लिएर सोधपुछ गरिएको छ । स्थानीय सञ्चारमाध्यमका अनुसार चालकले ब्रेक फेल भएर दुर्घटना भएको बताएका छन् ।