चलचित्र निर्देशक सुदर्शन थापा पक्राउ

काठमाडौं । चलचित्र निर्देशक सुदर्शन थापा पक्राउ परेका छन् । सोमबार दिउँसो मालीगाउँ प्रहरीले उनलाई पक्राउ गरेको हो ।

फिल्म ‘प्रसाद २’ को विवादमा उनलाई पक्राउ गरिएको प्रहरीले जनाइएको छ ।

अहिले निर्देशक थापालाई प्रहरी वृत्त बौद्धमा पठाइएको छ ।

प्रहरीका अनुसार उनलाई बालुवाटारको रोयल अम्पायर होटल परिसरबाट पक्राउ गरिएको हो । त्यहाँ उनी निर्देशित फिल्म ‘रावायण’को दोस्रो चरणको छायांकन सुरु हुने क्रममा थियो ।

फिल्म ‘प्रसाद–२’ का निर्माता सुदर्शन बस्नेतले गत साउन १० गते ओएसआर डिजिटल प्रा.लिका सञ्चालक ओमप्रकाश अग्रवाल र निर्देशक थापाविरुद्ध आपराधिक विश्वासघात गरेको आरोपमा प्रहरीमा जाहेरी दिएका थिए ।

आफूहरुको मञ्जुरीबिना फिल्मलाई देश तथा विदेशमा प्रदर्शन गरेर एक करोड ५० रुपैयाँ ठगी गरेको भन्दै निर्माता सुदर्शन बस्नेतले जाहेरी दिएका हुन् ।

थापा ‘प्रसाद–२’ का निर्देशक हुन् ।

यसअघि प्रहरीले अग्रवाललाई पक्राउ गरिसकेको छ ।

निर्देशक थापा पक्राउपछि ‘रावायण’ फिल्मको छायांकन रोकिएको छ ।