हमासद्वारा बन्धक बनाइएका ४ जनाको सकुशल उद्धार, शनिबार कम्तीमा ५५ जना मारिए

इजरायली सेनाले मध्य गाजाको नुसरत शरणार्थी शिविरमा गरेको कारबाहीका क्रममा हमासद्वारा बन्धक बनाइएका चार जनालाई सकुशल उद्धार गरेको छ ।

इजरायली सेना, गुप्तचर संयन्त्र र विशेष सैन्य बलले नुसरत शिविरका दुई भिन्दाभिन्दै स्थानबाट उनीहरुलाई उद्धार गरिएको इजरायली सुरक्षा बल (आईडीएफ) ले जनाएको हो ।

उद्धार गरिएकाहरुमा २५ वर्षीया नोआ आर्गामानी, २१ वर्षीय अल्मोग मिर जान, २७ वर्षीय एन्ड्री र ४० वर्षीय सिओमी जिभ छन् ।

उनीहरुलाई हमासका लडाकुले गत ७ अक्टोबरमा दक्षिणी इजरायलको नोभा सांगीतिक उत्सव समारोहबाट अपहरण गरेका थिए । उद्धार गरिएकाहरुको स्वास्थ्य अवस्था राम्रो रहेको र थप परीक्षणका लागि स्वास्थ्य केन्द्र पठाइएको आईडीएफले जनाएको छ ।

इजरायली सेनाले गाजामा आक्रमण गरी बन्धकलाई उद्धार गरेको यो तेस्रोपटक हो । यसअघि गत अक्टोबरमा एक र फेब्रुअरीमा दुई जनालाई मुक्त गराइएको थियो ।

इजरायली कारबाहीका क्रममा अन्य दुई बन्धक मारिएको भिडियो पनि सार्वजनिक भएको थियो । हमासले इजरायलमा गरेको आक्रमणका क्रममा २५१ जना अपहरणमा परेका थिए ।

जसमध्ये गत नोभेम्बरमा भएको अस्थायी संघर्षविरामका क्रममा एक सय पाँच जनालाई हमासले मुक्त गरेको थियो भने हमासको नियन्त्रणमा अझै ११६ जना रहेको बताइएको छ । तीमध्ये ४१ जना इजरायली सेना हुन् । हमासले अपहरण गरेका नेपाली विद्यार्थी विपिन जोशीको अवस्था भने अझै अज्ञात छ ।

यसैबीच, इजरायलले गाजामा हवाई, स्थल र समुद्र-तीनै तिरबाट आक्रमण तीव्र बनाएको छ । शनिबार मात्रै मध्यगाजाको देर एल-बलाह, रफाहको पश्चिमी क्षेत्र र उत्तरी गाजाका थुप्रै स्थानमा आक्रमण गरेको छ । गाजाको स्वास्थ्य मन्त्रालयले आक्रमणबाट दर्जनौं प्यालेस्टिनी मारिएको र अधिकांश महिला तथा बालबालिका रहेको जनाएको छ ।

अल-अक्सा अस्पतालका प्रवक्ताले कम्तीमा पनि ५५ जना मारिएको जनाएको छ । थुप्रै शव सडकमा छरिएको अवस्थामा रहेको अस्पतालका प्रवक्ताले जनाएका छन् ।