मेक्सिको पेनाल्टीमा चुक्दा भेनेजुएला क्वाटरफाइनलमा

काठमाडौं । भेनेजुएला कोपा अमेरिका फुटबलको क्वाटरफाइनलमा प्रवेश गरेको छ । समूह ‘बी’ अन्तर्गत आज बिहान भएको खेलमा मेक्सिकोलाई १-० ले हराउँदै भेनेजुएला क्वाटरफाइनलमा प्रवेश गरेको हो ।

प्रतिस्पर्धात्मक बनेको खेलमा बल नियन्त्रण मेक्सिकोले बढी राखे पनि ऊ गोल गर्न असफल भयो । ५५ औं मिनेटमा मेक्सिकोका जुलियनले फउल गरेपछि भेनेजुएलाले पेनाल्टी प्राप्त गर्‍यो । उक्त पेनाल्टीलाई सालमन रोनडनले गोलमा परिणत गर्दै अग्रता दिलाएका थिए ।

८३ औं मिनेटमा भेनेजुएलाका मिगुएल नाभारोले फउल गरेपछि भारले चेक गरेर मेक्सिकोलाई पेनाल्टीको अवसर दिइएको थियो । तर, ८७ औं मिनेटमा गरेको पेनाल्टी प्रहार मिस भयो ।

मेक्सिकोका ओरविलन पेनेडाले प्रहार गरेको पेनाल्टी खेर गएको थियो । त्यसपछि खेलमा मेक्सिको फर्कन सकेन र अन्ततः भेनेजुएला १–० को जितका साथ तालिकामा ६ अंक बनाउँदै शीर्ष स्थानमा उक्लियो । समूह चरणको अन्तिम खेलमा भेनेजुएलाले जमैकासँग खेल्दा मेक्सिकोले इक्वेडरसँग खेल्नेछ ।