नागरिक उड्डयन प्राधिकरणका महानिर्देशक प्रदीप अधिकारीको क्षमतामाथि सांसदहरुले उठाए प्रश्न
![](https://www.makalukhabar.com/wp-content/uploads/2023/10/Final-icon-Logo-2023.png)
![नागरिक उड्डयन प्राधिकरणका महानिर्देशक प्रदीप अधिकारीको क्षमतामाथि सांसदहरुले उठाए प्रश्न](https://www.makalukhabar.com/wp-content/uploads/2023/12/prdeep-adhikari-mk.png)
काठमाडौं । नेपाल नागरिक उड्डयन प्राधिकरणको नेतृत्वको क्षमतामाथि सांसदहरुले प्रश्न उठाएका छन् ।
बिहीवार प्रतिनिधि सभा अन्तर्गतको अन्तर्राष्ट्रिय सम्बन्ध तथा पर्यटन समितिको बैठकमा अधिकांश सांसदहरुले प्राधिकरणको नेतृत्व माथि प्रश्न उठाएका हुन् । सांसदहरुले प्राधिकरणको नेतृत्व आएसँगै मुलुकमा ७ भन्दा बढी हवाई दुर्घटना भएको भन्दै नेतृत्व माथि प्रश्न उठाएका हुन् ।
उनीहरुले विगत १९ महिनादेखि संसदीय समितिमा हवाई सुरक्षाका विषयमा भएको कामको परिणाम माग्दा समेत कुनै प्रगति विवरण समितिलाई दिन नसकेको भन्दै नेतृत्वको आलोचना समेत गरेका छन् ।
सांसदहरुले इयुको कालोसूचीबाट हटाउनको लागि प्राधिकरणले अहिलेसम्म गरेको काम सन्तोषजनक नभएको भन्दै परिणाम आउने गरी काम गर्न नसकेको उल्लेख गरे । सांसदहरुले प्राधिकरणको जिम्मेवारी लिएपछि ७ वटा हवाई दुर्घटना हुँदा समेत प्राधिकरणको नेतृत्व जिम्मेवार नभएको भन्दै राजीनामा दिन सक्नुपर्ने बताए ।
उनीहरुले नैतिकताको आधारमा नेतृत्वले राजीनामा गर्नुपर्ने उल्लेख गरे । प्राधिकरणको नेतृत्व जिम्मेवारी लिनुपर्ने भएपनि सधँै अरुलाई दोष दिने गरेको बताए । सांसदहरुले समितिमा बोल्दै नियमन र सर्भिस दिने निकाय फरक–फरक बनाउन आवश्यक रहेको बताए । उनीहरुले नेपाली आकाश सुरक्षित छ भन्ने वातावरण बनाउन आवश्यक ऐन कानून तत्काल बनाउन आवश्यक रहेको समेत बताए ।
समितिमा बोल्दै नेपाली काँग्रेसका सांसद उदय समशेर जबराले नेपाल नागरिक उड्डयन प्राधिकरणका महानिर्देशक प्रदीप अधिकारीको क्षमतामाथि प्रश्न उठाए । उनले अधिकारीले प्राधिकरणको नेतृत्व सम्हालेदेखि ७ वटा हवाई दुर्घटनामा परिसकेको भन्दै महानिर्देशकले जिम्मेवारी लिनुपर्ने बताए ।
उनले नेपाली आकाशमा आन्तरिक मात्र नभएर विदेशी जहाजहरू समेत दुर्घटनामा परेको बताए । उनले सन् १९९६ यता साना ठूला ६० वटा जहाज दुर्घटनामा परिसकेको बताए ।
उनले प्राधिकरणमा अधिकारीको नेतृत्व लिए यता मात्र ७ वटा जहाज दुर्घटनामा परिसकेको भन्दै यसको जिम्मेवारी लिनुपर्ने उल्लेख गरे । उनले अब प्राधिकरणको नेतृत्व फेर्ने कुरामा सोच्ने बेला आएको बताए ।
समिति बैठकमा बोल्दै नेकपा एमालेकी सचेतक सुनिता बरालले हवाई सुरक्षाका विषयमा देश,सरकार र मुलुकको अभ्यास यस्तै हो ? भन्दै प्रश्न गरिन् ।
जिम्मेवार निकायहरुले परिणाम ल्याउने कुरामा विषयान्तर गर्न नहुने बताइन् । उनले जिम्मेवार निकायका प्रमुखहरुले परिणाम दिने कुरामा विषयान्तर गर्न खोजेको बताइन् ।
उनले हवाई सुरक्षामा इयुको कालोसूचीबाट हटाउने लगायतका विषयमा मन्त्रीले प्राथमिकताका साथ काम गर्न आवश्यक रहेको बताइन् । सचेतक बरालले कोरियामा नेपाली जहाज उडान गर्ने विषय प्राविधिक समस्या देखाएर अड्काएर राख्न नहुने बताइन् ।
उनले प्राधिकरणको नेतृत्व र वायुसेवा निगमको नेतृत्वले सम्बन्धित निकायहरुसँग उडान गर्न तदारुकता नदेखाएको देखिएको बताइन् ।
उनले दुतावासले प्रयास गर्दा समेत प्राधिकरण र नेपाल वायु सेवा निगमले काम नगरेको बताइन् ।
समिति बैठकमा बोल्दै राष्ट्रिय स्वतन्त्र पार्टीका सांसद शिशिर खनालले प्राधिकरणमा प्रदीप अधिकारी महानिर्देशक भएपछि मात्रै ७ वटा जहाज विमान दुर्घटना भएको बताए ।
उनले ७ वटा जहाज विमान दुर्घटनामा ११८ जनाको ज्यान गएको बताए । उनले पछिल्लो दुई वर्षमा ७ वटा विमान दुर्घटना हुनुमा नागरिक उड्डयन प्राधिकरणको नेतृत्वको कमजोरी रहेको कुरा तथ्यबाट स्पष्ट भन्न सकिने अवस्था रहेको बताए ।
उनले ७ वटा हवाई दुर्घटनाबाट मुत्यु भएका ११८ जनाको नैतिक दायित्व कसले लिने ? भन्दै प्रश्न गरे । उनले अधिकारीले प्राधिकरणको नेतृत्व सम्हाले यता मात्र ७ वटा हवाई दुर्घटनामा परिसकेकाले क्षमतामाथि प्रश्न उठाउन सक्ने ठाउँ रहेको बताए ।
सांसद एकनाथ ढकालले पनि सौर्य एयरलाइन्सको दुर्घटनाका विषयमा नागरिक उड्डयन प्राधिकरणका महानिर्देशक प्रदीप अधिकारी पन्छिन खाजेको बताए ।
उनले संसदीय समितिमा सांसदहरुले सोधेका प्रश्नबाट कोही पनि भाग्न नमिल्ने बताए । उनले संसदीय समितिमा सांसदहरुले सोधिएका प्रश्नको जवाफ दिन सक्नुपर्ने नत्र पदबाट राजीनामा दिनुपर्ने बताए ।
उनले हवाई सुरक्षा सम्बन्धि नियमनकारी निकायहरुको समितिमा आएको जवाफबाट सन्तुष्ट नभएको बताए । उनले नियमनकारी निकायका प्रमुखहरुले लिएको जवाफबाट आफ्नो जिम्मेवारबाट भाग्न खोजेको देखिएको बताए ।
सांसद ढकालले नागरिक उड्डयन प्राधिकरण र नेपाल वायुसेवा निगमको द्वन्द्वलाई लिएर मन्त्रीले हिँड्न नहुने बताए । उनले कोरियामा नेपाली जहाज जान नपाउने तर कोरियन जहाज नेपालमा आउने भन्दै कोरिया जहाज पनि रोक्न आवश्यक रहेको बताए ।
उनले कोरियन जहाज नेपाल आउन प्राधिकरणले रोके समितिले साथ दिने बताए ।
नागरिक उड्डयन प्राधिकरणका महानिर्देशक प्रदीप अधिकारीले अहिलेसम्म भएका हवाई दुर्घटना र मुत्यु भएका ९६९ को जिम्मेवारी लिने बताए ।
उनले सबै दुर्घटनाको नैतिक जिम्मेवारी आफ्नो भएको बताए । उनले अहिले राज्यले गठन गरेको आयोग नै आधिकारीक भएको बताए । उनले आयोगले छानविन गरेर जसको गल्ति देखायो त्यसकै गल्ति हुने बताए ।
उनले समितिमा आफ्नो व्यक्तिगत रुपमा छलफल गरिएको बताए । उनले प्राधिकरणको नियममा बादलभित्र जहाज जानु हुँदैन भन्ने रहेपनि जोमसोम दुर्घटनामा पाइलटले बादलमा लैजाँदा विमान दुर्घटना भएको बताए ।
![](https://www.makalukhabar.com/wp-content/uploads/2023/10/Final-icon-Logo-2023.png)