सन्दीप र दीपेन्द्रको टोली पराजित, रोहित आवद्ध टोरोन्टोको लगातार जित

काठमाडौं । ग्लोबल टी-२० क्यानडा लिगमा नेपाली राष्ट्रिय क्रिकेट टोलीका कप्तान रोहितकुमार पौडेल सहभागी टिम टोरोन्टो नेसनल्सले लगातार दोस्रो जित निकालेको छ । गएराति भएको खेलमा टोरोन्टोले ब्रैम्प्टन वुल्सलाई ८ विकेटले पराजित गरेको हो ।

टस जितेर पहिला ब्याटिङ गरेको वुल्सले १९.१ ओभर खेल्दा सबै विकेट गुमाएर ११० रन बनाएको थियो । टोरोन्टोले १११ रनको लक्ष्य १३.२ ओभरमा भेट्टाएको हो । प्लेइङ-११ मा रहनुभएका नेपालका कप्तान पौडेलले भने ब्याटिङ गर्नु परेन । यो जितसँगै रोहितको टीम चार अंकसहित शीर्ष स्थानमा छ ।

यस्तै नेपालका लेग स्पिनर सन्दीप लामिछाने र अलराउन्डर दीपेन्द्र सिंह ऐरी सहभागी भ्यानकुभर नाइट्सले ग्लोबल टी–२० क्यानडा लिगमा लगातार दोस्रो हार ब्यहोरेको छ । शनिबार साँझ भएको खेलमा बंगला टाइगर्स मिसिसाउगाविरुद्ध पहिले बलिङ गरेको भ्यानकुभर २२ रनले पराजित भएको हो ।

खेलमा नेपाली राष्ट्रिय क्रिकेट टोलीका लेग स्पिनर लामिछानेले दुई विकेट लिए । ब्याटिङतर्फ दीपेन्द्र भने चल्न सकेनन् । २ बलको सामना गरेका उनले १ रन मात्र बनाए । ब्याटिङतर्फ नटआउट सन्दीपले तीन बलको सामना गर्दै २ रन जोडे ।