मर्स्याङ्दी कोरिडोरका १४ पालिका एकै ठाउँमा, एकीकृत विकासका लागि साझा कार्यक्रम गरिने

यसअघिको बैठकले सुन्दरबजार नगरपालिकाका मेयर कृष्ण कोइरालाको अध्यक्षतामा शिक्षा उपसमिति गठन गरेकोमा समितिले कोरिडोर क्षेत्रका विद्यालयको अवस्था र स्थायित्वका लागि आवश्यक सुझाव सहितको प्रतिवेदन पेस गरेको छ । यस्तै, करिडोरका पालिकाहरूबिचको सहकार्यलाई मजवुद बनाउँदै लैजाने निर्णय गरिएको मर्स्याङ्दी गाउँपालिकाका अध्यक्ष अर्जुन गुरुङले सुनाए । ‘धेरै पालिकाहरू मिलेर कुन क्षेत्रमा लगानी गर्न सकिन्छ र कसरी एकीकृत विकास गर्न सकिन्छ भन्ने विषयमा छलफल केन्द्रित छ,’ उनले भने, ‘यसबाट अन्तरपालिका असल अभ्यासको आदानप्रदान र कमजोरी सुधार्न पनि सहयोग पुगेको छ ।’

खासगरी फोहोरमैला व्यवस्थापन, एम्बुलेन्स र दमकल सञ्चालन, उद्योग स्थापना र सञ्चालन जस्ता क्षेत्रमा पालिकाहरूले एकीकृत रूपमा काम गर्न सकिने छलफलका सहभागीहरूले सुझाएका छन् । समितिमा १४ पालिकाका प्रमुख, उपप्रमुख तथा प्रमुख प्रशासकीय अधिकृत सदस्य छन् । गोरखाको पालुङटार, गोरखा नगरपालिका र शहिद लखन गाउँपालिका, तनहुँको भानु नगरपालिका, बन्दिपुर र आँबुखैरेनी गाउँपालिका, लमजुङको राइनास, सुन्दरबजार र बेंशीसहर नगरपालिका तथा दोर्दी र मर्स्याङ्दी गाउँपालिका, मनाङको नासों, चामे र मनाङ ङिस्याङ गाउँपालिका सदस्य छन् । समितिको अर्को बैठक कात्तिकको ९, १० र ११ गते चामेमा बस्ने निर्णय भएको छ ।