रुख ढलेर किच्दा लीलादेवीले गुमाइन् ज्यान

काठमाडौं । लमजुङमा रुख ढलेर किच्दा एक महिलाको मृत्यु भएको छ । सोमबार साँझ ५ बजे सुन्दरबजार नगरपालिका-१ कुन्छाका ८२ वर्षीय लीलादेवी मिश्रको रुखले किचेर मृत्यु भएको जिल्ला प्रहरी कार्यालयलले जनाएको छ ।

मृतक मिश्र घरदेखि एक सय मिटर दूरीमा रहेको कुवामा पानी भर्न जाने क्रममा रुख ढलेर किच्दा घटनास्थलमै मृत्यु भएको हो । कुवाभन्दा अन्दाजी १० मिटरमाथि रहेको काब्रोको रुख एक्कासी ढल्दा मिश्रको घटनास्थलमै मृत्यु भएको प्रहरी निरीक्षक थानेश्वर चपाईंको भनाइ छ । पानी परिरहेकाले जमिन भासिँदा रुख ढलेको हुनसक्ने अनुमान प्रहरीले गरेको छ ।

प्रहरी घटनास्थलमा पुगेर मुचुल्का उठाएको छ । प्रहरी निरीक्षक चपाईंका अनुसार शव परीक्षण गर्न बेंसीसहर ​ नगरपालिका-८ स्थित जिल्ला अस्पताल ल्याइँदै छ । मृतक मिश्रकी श्रीमान् र तीन छोरा बुहारी रहे पनि घरमा श्रीमान् मात्रै बस्दै आएको प्रहरीले जनाएको छ ।