कार्यकर्ता भर्ती गर्ने बाटो सहज बनाउन उपसभामुखबिरुद्ध महाअभियोग लगाउँदैछन् : अध्यक्ष लिङदेन
मकालु खबर
झापा । राष्ट्रिय प्रजातन्त्र पार्टी(राप्रपा)का अध्यक्ष राजेन्द्र लिङदेनले संवैधानिक परिषद्मा सहज बहुमत पुर्याउन उपसभामुख इन्दिरा रानाबिरुद्ध महाअभियोग लगाउने तयारी गरिएको भन्दै बिरोध जनाएका छन् ।
मंगलवार झापामा आयोजित एक कार्यक्रमलाई सम्बोधन गर्दै उनले यस्तो बताएका हुन् । उनले नेपाली कांग्रेस र नेकपा एमाले सहितका सत्तारुढ दलहरु संवैधानिक अंगहरुमा आफ्नो कार्यकर्ता नियुक्ति गर्न र अहिलेको संवैधानिक परिषद्को गणितलाई सहज बनाउन उपसभामुख हटाएर कार्यकर्ता नियुक्ति गर्ने तयारीमा लागेको बताए ।
जनताको असन्तुष्टि छताछुल्ल भइराख्दा पनि राजनीतिक दलहरु सच्चिने बाटोमा नगएको उनले बताए । राजनीतिक दलहरु फेरि पनि जति सकिन्छ लुटौँ, खाऔँ भन्ने बाटोमा गइरहेको उनले आरोप लगाए । अध्यक्ष लिङदेनले सत्तारुढ राजनीतिक दलका लागि देश प्राथमिकतामा नरहेको समेत बताए ।
उनले भने, ‘मलाई सचेतकले भनिरहनुभएको थियो, काँग्रेस र एमालेको बैठक र सरसल्लाह के भइरहेको छ रे भने संवैधानिक अंगहरुमा आफ्नो कार्यकर्ता नियुक्ति गर्न अहिलेको संवैधानिक परिषद्को गणितले अफ्ठ्यारो पार्यो । बहुमत पुगेन रे । बहुमत नपुगेपछि बहुमत पुर्र्याएर आफ्नो कार्यकर्ता नियुक्ति गर्न के गर्नुपर्यो भन्दा उपसभामुख हटाउन महाअिभियोग लगाउनुपर्यो भनेर भनिरहेको छ । देश कहाँ गइरहेको छ । यत्रो परिवर्तन आइसक्दा, जनताको असन्तुष्टि यस प्रकार छताछुल्ल भइराख्दा पनि उनीहरु सच्चिने बाटोमा छैनन् । फेरि पनि जति सकिन्छ लुटौँ, जति सकिन्छ खाऔँ । सबै हामी खाऔँ भन्ने बाटोमा लागेका छन् । देश प्राथमिकतामा छैन उनीहरुको ।’
अध्यक्ष लिङदेनले गणतन्त्र, धर्म निरपक्षता र संघीयताको बोझ देशले बोक्न नसक्ने बताउनु भयो । यसको अन्त्य नगरी देशले स्थायित्व प्राप्त गर्न नसक्ने जिकिर गरे ।
देश र धर्म जोगाउने अभियानमा राप्रपा हिँडेको उल्लेख गर्दै उनले आफू भ्रष्टाचार अनियमिततामा शुद्ध भएकाले कुनै पनि अग्नि परीक्षा दिन तयार रहेको बताए ।
मकालु खबर
