वामदेवको प्रस्ताव : नेपाल–भारत सिमानामा पर्खाल लगाऔँ, भिसा प्रणाली लागू गरौँ

काठमाडौँ । राष्ट्रिय सभा सदस्य वामदेव गौतमले नेपाल–भारत सिमाना बन्द गरेर भिसा प्रणाली लागू गर्नुपर्ने बताएका छन् ।

बुधवार राष्ट्रिय सभा अन्तर्गतको विकास आर्थिक मामिला तथा सुशासन समितिको बैठकमा सुपारीको उत्पादन र निकासीमा भएका समस्याका सम्बन्धमा छलफल गर्दै उनले यस्तो बताएका हुन् ।

उनले नेपाल–भारत खुला सिमानाका कारण नेपालमा उत्पादन भएका वस्तुहरू भन्सार बाहिरबाट भारतमा निर्यात हुने गरेको भन्दै सिमानामा पर्खाल लगाउनुपर्ने बताए । उनले सुपारी निर्यातको विषय सरकारले टुङ्ग्याउन नसक्नु सरकारको असक्षमता भएको उल्लेख गर्दै सरकारमा रहेका व्यक्तिहरू नै तस्करहरूसँग मिलेर काम गरिरहेका आरोप लगाए । उनले खुला सिमाना बन्द गर्दै भिसा प्रणाली लागू गर्नुपर्नेमा जोड दिए ।

उनले भने – ‘यो सरकारको असक्षमता हो । यहाँ सरकारमा रहेका व्यक्तिहरू नै तस्करहरूसँग मिलेर यो सबै काम गरिराखेका छन् । र कहिल्यै पनि समाधान नहुने गरी समितिमा विषय पठाइदिन्छन् । समितिमा यसरी आउने हो विषय ? विधेयक बनेर आउनुपर्छ । नेपाल र भारतका बिचमा सिमाना खुल्ला छ । हाम्रो देशका ठूल्ठूला पार्टीहरू ५०/६० वर्षदेखि बन्द सिमाना कायम गर भन्दै आएका छन् । भारततिरबाट नेपालतिर पसेर कयौँ मानिस मारिएका छन् । नेपाली जनता मारिएका छन् । त्यो खुला सिमाना प्रयोग गरेर काठमाडौँ रहेका मानिसलाई पक्रेर भारतले लिएर जान्छ । हामी पछि थाहा पाउँछौँ । यस्तै हुन्छ स्वतन्त्र देशको अवस्था । त्यहाँ सुधार गर्न किन कोसिस हुँदैन ? त्यस सम्बन्धमा मेरो गम्भीर आरोप छ नेपाल सरकारलाई, उसले हेर्नुपर्छ । उसले गर्नुपर्छ । यदि नयाँ कुनै व्यवस्था गर्ने हो भने छलफल गर्न हामीलाई पठाउनुपर्छ । नेपालमा उत्पादन भएको वस्तु भन्सार नतिरीकन खुला सिमानाबाट भारततिर गएको छ । भन्सारबाट मात्रै जाने व्यवस्था गरौँ । पर्खाल लगाऔँ । नेपाल भारतको बिचमा तार लगाऔँ । खुला सिमाना बन्द गर । मेरो आजको प्रस्ताव यही हुन्छ । नेपाल–भारत सिमाना बन्द गर । भिसा प्रणाली लागू गर ।’

राष्ट्रिय सभा गौतमले मानिसको आवतजावत पनि तोकिएको भन्सार नाकाबाट मात्रै हुनुपर्ने बताए । खुला सिमानाका कारण भारतबाट नेपालमा पसेर व्यक्ति हत्या समेत हुने गरेको भन्दै स्वतन्त्र देशको अवस्था यस्तो हुनु नहुने बताए ।