‘पूर्णबहादुरको सारङ्गी’को कथा आफ्नो उपन्याससँग मिलेको लेखकको आरोप, दिए ९ आधार

‘पूर्णबहादुरको सारङ्गी’को कथा आफ्नो उपन्याससँग मिलेको लेखकको आरोप, दिए ९ आधार

काठमाडौं । लक्ष्मीपूजाको अवसरमा प्रदर्शनमा आएको फिल्म ‘पूर्ण बहादुरको सारङ्गी’ ले बक्स अफिसमा उल्लेखनीय व्यापार गरिरहेको छ । फिल्मले दर्शकको मन जित्दै शोको संख्या र उपस्थिति दुबैमा नयाँ रेकर्ड बनाएको छ ।

बिहान ५ बजेदेखि साँझ ११ बजेसम्मका सबै शोमा टिकटको अत्यधिक मागले यसलाई सफलताको अर्को स्तरमा पुर्‍याएको छ । सरोज पौडेलले निर्देशन र लेखन गरेको यस फिल्मको कथा दर्शकलाई भावुक बनाइरहेको छ । निर्देशक पौडेलले आफ्नो बुबाको निधनपछि महसुस गरेका अनुभवलाई फिल्मको कथामा प्रतिबिम्बित गरेको बताएका छन् ।

तर, फिल्मको सफलता बीच यसले साहित्यिक चोरीको आरोप पनि खेप्नु परेको छ । उपन्यासकार डा. शिवशंकर बस्यालले आफ्नो २०२० मा प्रकाशित उपन्यास ‘सङ्ग्रामपुर’को कथा फिल्मसँग मिलेको दाबी गरेका छन् । उनले फेसबुकमा पोस्ट गर्दै फिल्म र उपन्यासबीच कथाका थुप्रै बुँदाहरू समान रहेको दावी गरेका छन्।

बस्यालले फिल्मका दुई पात्र पूर्णबहादुर र कमल उपन्यासका रूपमान र समीरसँग मिलेको, दुवैमा बिछोडको प्रसङ्ग, र दुवै कथामा पिताको दबाबमा छोरोले मेडिकल पढ्ने प्रसङ्ग समान रहेको दाबी गरेका छन् । उनले यस्ता अन्य धेरै प्रसङ्गहरू पनि फिल्ममा रहेको बताएका छन् ।

‘पूर्ण बहादुरको सारङ्गी’ले बाबुले छोराका लागि देखेको सपना र संघर्षको कथा प्रस्तुत गर्दछ । फिल्ममा विजय बराल र प्रकाश सपूतले बुबा-छोराको भूमिकामा अभिनय गरेका छन् भने अञ्जना बराइली, मुकुन भुसाल, माओत्से गुरुङ, बुद्धि तामाङ लगायत अन्य कलाकारहरूको उत्कृष्ट प्रस्तुति रहेको छ ।

यस्तो छ उपन्यासकार डा. बस्यालको तर्क :-

पूर्णबहादुर को सारङ्गी र सङ्ग्रामपुर उपन्यास ।

बजारमा मन जितिरहेको पूर्णबहादुरको सारङ्गीले मेरो पनि मन तानिरहेको थियो। पहिले ट्रेलरहरू आइपुग्दाखेरि कहीँ न कहीँ परिचित परिवेश जस्तै लागिरहेको थियो। यसै बीचमा संग्रामपुर उपन्यास पढेका एकजना भाइले चलचित्र हेरेपछि यसको कथा सङ्रामपुर उपन्यासभित्र रहेको कथा सङ मिलेको कुरा बताए ।यसले मलाई केही कौतुहल बनायो। त्यसपछि म बिरामी अवस्थामै हल पुगे । पूर्णबहादुरको सारङ्गी लाई एकपटक सङ्ग्रामपुर उपन्याससँग जुधाएँ। चलचित्रको मूल कथाको स्वरूपमा संग्रामपुर उपन्यासका मूल मिलेका मूल प्रसङ्ग मात्र यी पाएँ।

१ पूर्णबहादुर र कमल चलचित्रका दुई मात्र मूलपात्र हुन्। जसरी सङ्ग्रामपुर उपन्यासमा रूपमान र समीर !

२ पूर्णबहादुरको स्त्री बिछोडको रहस्यमयी प्रसङ्ग संग्रामपुरमा रुपमानको स्त्री बिछोडको प्रसङ्ग जस्तै रहस्यमयी छ।

३ छोराको पालनपोषणमा दिलोज्यान मरिमेटी पूर्णबहादुरको शैली रुपमान सङ मिल्दा छन्।

३ आमाको रहस्यमय कथा पूर्णबहादुरका अगाडि कमलले सोधेजस्तै पटकपटक रूपमानलाई समिरले निरन्तर सोधिरहने प्रसङ मिल्दो छ ।

४ जसरी कमललाई विद्यालयका प्रधानाध्यापकले समाजको निम्न जात भनेर अपमान गरेर व्यङ्ग्य गरेका छन, समिर लगायत रूपमानलाई विद्यालय व्यवस्थापन समितिका अध्यक्ष अर्थात मुखिया र छोराले उस्तै शैलीमा अपमानित गरेका छन ।

५ पूर्णबहादुरको सारङ्गीको कमल पनि सङ्ग्रामपुर उपन्यासको समिर जस्तै टप विद्यार्थी हुनु।

६ त्यही टप भएको खबर सङ्ग्रामपुर उपन्यासको समिरकै शैलीमा दौडिदै पूर्णबहादुरको सारङ्गीमा कमलले उही भावमा बाबुलाई खबर बताउनु ।

७ संग्रामपुर उपन्यासको समीरले जस्तै पूर्णबहादुरको सारङ्गीको कमल गन्धर्वले मेडिकलमा नाम निकाल्नु ।

८ बालाई आर्थिक जोहो गर्न कठिन हुन्छ भनेर सङ्ग्रामपुर उपन्यासको समिरले मेडिकल पढ्न नखोजेजस्तै कमल गन्धर्वले पनि यही भावले मेडिकल पढ्न जान नखोज्नु ।

९ रुपमानकै जोर जबरजस्तीले समीर मेडिकल पढ्न गए जस्तै पूर्णबहादुरकै जबरजस्तीले कमल मेडिकल पढ्न जानु।

यी यी त कथाका मूल प्रसङ्गहरू हुन्। यी बाहेक सूक्ष्म ढङ्गले सङ्ग्रामपुर उपन्यासको प्रभाव त्यहाँभित्र देख्न पाइन्छ। पूर्णबहादुरले नाचेको नाचको भाव, छोराको परिचयबाट चिनिने प्रसङ, आफ्नो तिब्रामा बल छ भन्ने दृश्यहरू पनि उपन्यासको छायाचित्रसँग मिल्छन्।

केही प्रसङ्गहरू बिल्कुल विपरीत रुपमा प्रयोग गरिएका छन्। पुर्णबहादुरको सारङ्गीमा पूर्णबहादुर गन्धर्व छ , सङ्ग्रामपुर उपन्यासमा रूपमान भरिया । सङ्ग्रामपुर उपन्यासमा बाबु छोराको प्रेमसहित समिर सहरबाट फर्केपछि क्रान्तिकारी काममा लाग्छ। पूर्णबहादुरको सारङ्गीमा क्रान्तिका कुरा गर्छ तर क्रान्तिलाई नफरत गर्छ।

माथिका मूल बुँदाहरू नै पूर्णबहादुरको सारङ्गीको मूल कथा हो। मैले यसलाई साहित्यिक रूप मात्र प्रस्तुत गरे। यो भन्दा अरु कथामा नौलो भेटिन।

तसर्थ यो संयोग होइन,यो नियोजित हो। एउटा क्रान्तिकारी उपन्यासलाई क्रान्ति विरोधी कार्यमा लगाउने प्रपञ्च ।

कुनै लोभ लालच प्रपञ्चले मैले यसो भनिरहेको छैन। एउटा स्रष्टाको जन्मदाताको हैसियतले रुपरङ्ग मिल्दा बोल्ने नैतिक दायित्व मेरो पनि हो ! म अब नबोलौला , तर इतिहासमा यो कोलाहाल रहिरहनेछ।

मन जितिरहेको यो चलचित्रले अरु मान्छेहरुको मन जितिरहोस । मेरो यही शुभकामना!!!

All reactions:

Ganesh Thagunna and 279 others