आज हरिबोधिनी एकादशी : विष्णुभक्तिको महान् पर्व (तस्बिरहरु)

काठमाडौं । हरिबोधिनी एकादशी आज तुलसी र दामोदरको ‘विवाह’ गराई मनाइँदै छ । चार महिनासम्म भगवान् विष्णुका भक्तले तुलसीको व्रत गरी विशेष पूजा गर्ने गर्छन् । त्यसपछि यस दिन तुलसी र दामोदरको विवाह गराइन्छ ।

आषाढ शुक्ल एकादशी अर्थात् हरिशयनी एकादशीदेखि कार्तिक शुक्ल एकादशी (हरिबोधिनी एकादशी)का दिनसम्म तुलसीको विशेष पूजा-आराधना गर्ने गरिन्छ ।

आज काठमाडौंका चाँगुनारायण, बूढानीलकण्ठलगायत विष्णुको मन्दिरमा विशेष मेला लाग्छ । चाँगुनारायणमा भक्तजनको उल्लेख्य उपस्थिति देखिएको छ । प्रत्येक वर्ष कार्तिक शुक्ल एकादशीका दिनमा भगवान् विष्णुको प्रतीकका रूपमा तुलसीको दामोदरसँग ‘विवाह’ र विशेष पूजा गरी हरिबोधिनी एकादशी पर्व मनाउन लागिएको हो ।

हरिशयनी एकादशीका दिन घरघरमा रोपेर विशेष पूजा गरिएको तुलसीको मठमा गाईको गोबर र रातो माटोले पोतेर फूलमाला, तोरनले सजाएर ‘विवाह’ गराइन्छ ।