कुवेतविरुद्ध कप्तान पुजाको शानदार शतक

काठमाडौं । नेपालकी कप्तान पूजा महतोले कुवेतविरुद्ध शानदार शतक प्रहार गरेकी छन् ।

उनले ५७ बलमा शतक प्रहार गरेकी हुन् । यो नेपाली महिला क्रिकेटरले प्रहार गरेको दोस्रो शतक हो ।

नेपालले अहिले कुवेतविरुद्ध ब्याटिङ गरिरहेको छ । क्रिजमा कप्तान पुजा र सोनी पाख्रिन रहेकी छन् ।

युएईमा जारी आइसिसी यु–१९ महिला टि–२० विश्वकपको एसिया छनोटको पाचौँ खेलमा आज नेपालले कुवेतसँग खेलिरहेको हो ।

नेपालले यसअघि तीन खेलमा जित हासिल गरेको छ, भने एक खेलमा पराजित भएको छ । प्रतियोगिताको पहिलो खेलमा नेपालले थाइल्याण्डलाई ६७ रनको फराकिलो अन्तरले पराजित गरेको थियो । यस्तै, दोस्रो खेलमा कुवेतलाई एक सय आठ रनले हराएको थियो ।

नेपालले तेस्रो खेल शनिबार घरेलु टोली युएईसँग खेलेको थियो । उक्त खेलमा १३ रनले पराजित भएको थियो । चौथो खेलमा आइतबार थाइल्याण्डलाई १०६ रनले पराजित गरेको थियो ।

छनोट खेलमा आयोजक युएईसहित नेपाल, कुवेत र थाइल्याण्ड सहभागी छन् । सहभागी चार टोलीमध्ये शीर्ष स्थान हासिल गर्ने टोली सन् २०२५ मा मलेसियामा हुने विश्वकपका लागि छनोट हुनेछ ।