कुवेत ४८ रनमा अलआउट, नेपालको फराकिलो जित

काठमाडौं । आईसीसी यू–१९ महिला टी–२० विश्वकप एसिया छनोटमा नेपालले चौथो जित दर्ता गरेको छ ।

आज मङ्गलवार भएको आफ्नो पाँचौँ खेलमा नेपालले कुवेतलाई १६५ रनको फराकिलो अन्तरले हराएको हो ।

नेपालले दिएको २१४ रनको लक्ष्य पछ्याएको कुवेत १३ ओभरमा ४८ रनमा अलआउट भयो ।

कुवेतलाई सस्तैमा अलआउट गर्न नेपालकी कप्तान पूजा महतोले घातक बलिङ गरिन् । उनले ४ ओभरमा ८ रन खर्चिएर ५ विकेट लिइन् । सिमाना केसी र रचना कुमारी चौधरीले समान २–२ विकेट लिइन् ।

त्यसअघि टस जितेर पहिले ब्याटिङ गरेको नेपालले विस्फोटक ब्याटिङ गर्‍यो । नेपालकी कप्तान पूजाले शानदार शतक प्रहार गरिन् । उनले ६९ बलमा १३० रनको नट आउट पारि खेलिन् ।

यस्तै उपकप्तान सोनी पाख्रिनले पनि ४३ रनको नट आउट पारि खेलिन् । उनले ३३ बलको सामना गरिन् ।

ओपनर सावित्री धामीले ११ र साना प्रवीणले ६ रनको योगदान दिइन् ।