रविलाई सरकारी वकिलको कार्यालय रुपन्देही लगियो

काठमाडौं । रास्वपा सभापति रवि लामिछानेलाई दोस्रो दिनको बयानका लागि रुपन्देहीस्थित जिल्ला सरकारी वकिलको कार्यालयमा उपस्थित गराइएको छ । उनलाई बुटवलमा सुप्रिम सहकारी घोटाला प्रकरणमा अनुसन्धानका लागि जिल्ला प्रहरी कार्यालयबाट सरकारी वकिलको कार्यालय ल्याइएको हो ।

लामिछानेलाई कास्कीबाट मंगलबार रुपन्देहीमा ल्याइएको थियो । उनीमाथि बुटवलको सुप्रिम बचत तथा ऋण सहकारी संस्थाबाट १४ करोड २९ लाख रुपैयाँ गोरखा मिडिया नेटवर्क प्रालिमा लगानी गरेर दुरुपयोग गरेको आरोपमा अनुसन्धान भइरहेको छ । मंगलबारको बयानका क्रममा लामिछानेले आफूले सहकारीको रकम नलिएको दाबी गरेका छन् ।

पोखराको सूर्यदर्शनसँगै बुटवलस्थित सुप्रिम सहकारीको रकम अपचलनमा समेत अनुसन्धान गर्नुपर्ने देखिएपछि उनलाई हवाईमार्गबाट भैरहवा विमानस्थल हुँदै इलाका प्रहरी कार्यालय बुटवल लगिएको थियो । बुटवलमा बयान सकिएसँगै उनलाई काठमाडौं ल्याउने तयारी प्रहरीले गरेको छ ।

सूर्यदर्शन सहकारी ठगीमै पक्राउ परेका कुमार रम्तेललाई काठमाडौं पठाउन कास्की प्रहरीलाई पत्राचार गरिएको छ । प्रहरीले ओखलढुंगाका गितेन्द्रबाबु (जिबी) राईले सञ्चालन गरेका काठमाडौंको स्वर्णलक्ष्मी, पोखराको सूर्यदर्शन, रुपन्देहीको सुप्रिम, चितवनको सहारा र पर्साको सानोपाइला सहकारीमार्फत गोर्खा मिडिया नेटवर्कमा रकम गएको देखिएपछि अनुसन्धान थालेको हो । लामिछाने गोर्खा मिडियाद्वारा सञ्चालित ग्यालेक्सी टेलिभिजनको प्रबन्ध निर्देशक थिए । पाँच सहकारी ठगीका मुख्य आरोपित जिबी राई भने फरार छन् ।