विश्वकपमा छनोट भएको महिला टोलीलाई २ लाख ५० हजार नगद सहित सम्मान गरिने

काठमाडौं । विश्वकपमा छनोट भएको १९ वर्ष मुनिको महिला टोलीलाई नगदसहित सम्मान गरिने भएको छ ।

नेपाल क्रिकेट संघ (क्यान)ले टोलीका प्रत्येक खेलाडीलाई जनही २ लाख ५० हजार दिनेछ । टिम अफिसियलहरुलाई १ लाख ५० हजार दिइने नेपाल क्रिकेट संघ (क्यान)ले जानकारी दिएको छ । क्यानले नेपाली क्रिकेट टोलीलाई बधाइ दिँदै उक्त पुरस्कार दिने घोषणा गरेको हो ।

बुधबार युनाइटेड अरब इमिरेट्स (युएई) मा भएको आइसीसी १९ वर्ष मुनिको महिला विश्वकपको एसिया छनोटको अन्तिम खेलमा युएईलाई आठ विकेटले हराउँदै नेपाल विश्वकपमा छनोट भएको थियो । सन् २०२५ को जनवरीमा मलेसियामा १९ वर्ष मुनिको महिला विश्वकप हुँदैछ ।

त्यस्तै १९ वर्ष मुनिको महिला क्रिकेट टोलीले आगामी मंसिर ३० गतेदेखि मलेसियामा हुने एसीसी १९ वर्ष मुनिको महिला एसिया कपमा सहभागी जनाउनेछ ।

एसिया कपमा नेपालसहित छ टोलीको सहभागिता रहने छ । एसियाली क्रिकेट परिषद् (एसीसी) अनुसार समूह ‘ए’ मा नेपालसहित भारत र पाकिस्तान छन् भने समूह ‘बी’ मा बङ्गलादेश, श्रीलङ्का र मलेसिया छन् ।