विश्वकप विजेता सोहेलले चितवन राइनोजबाट खेल्ने

काठमाडौं । नेपाल प्रिमियर लिग (एनपीएल) मा सोहेल तनभिरले चितवन राइनोजबाट खेल्ने भएका छन् । चितवन  राइनोजले बिहीबार साँझ विज्ञप्ति जारी गर्दै पाकिस्तानका अनुभवी बलिङ अलराउण्डर तनभिरलाई अनुबन्ध गरेको जनाएको हो ।

दक्षिण अफ्रिकी बलर मर्चेन्ट डे लाङ घाइते भएका कारण नआउने भएपछि तनभिरलाई उनको प्रतिस्थापनको रूपमा ल्याइएको हो ।

३९ वर्षीय तनभिरले पाकिस्तानबाट लामो समय खेलेका छन् । उनको पाकिस्तान सिनियर टिम तथा अन्य फ्रेन्चाइज लिगमा रामरो अनुभव छ । फर्स्ट क्लास क्रिकेटमा उनले ७४ खेलमा ३१० रन बनाएका छन् ।

बाँयाहाते मिडियम पेस बलिङ गर्ने उनले पाकिस्तानका लागि ५७ टी-२०आई खेलमा ५४ विकेट लिएका छन् । त्यसैगरी सबैखाले टी२०मा ३८८ खेल खेल्दा ३८९ विकेट लिएका छन् । त्यसैगरी ब्याटिङमार्फत २७०० भन्दा धेरै रन पनि बनाएका छन् ।

उनले पाकिस्तानबाट सन् २००९ को टी२० विश्वकप जितेका छन् भने राजस्थान रोयल्सबाट इन्डियन प्रिमियर लिग आइपीएल पनि जितेका छन् । त्यसैगरी पाकिस्तान सुपर लिग पनि जितेका छन् ।