वैवाहिक जीवनमा बाँधिइन् ‘मायालु तिमी कता छौ’ की गायिका दाहाल

काठमाडौं । गायिका स्मिता दाहाल वैवाहिक जीवनमा बाँधिएकी छन् ।

शुक्रवार काठमाडौंको गोकर्णस्थित नर्लिङ रिसोर्टमा उनी आफ्ना प्रेमी सायुज्य श्रेष्ठसँग विवाह बन्धनमा बाँधिएकी हुन् । स्मिता र सायुज्य कलेजदेखि नजिकिएका थिए ।

स्मिता नेकपा माओवादी केन्द्रका अध्यक्ष पुष्पकमल दाहाल प्रचण्डकी नातिनी हुन् । आयोजित समारोहमा नेकपा एकीकृत समाजवादीका अध्यक्ष माधवकुमार नेपाल, माओवादी केन्द्रका उप–महासचिव जनार्दन शर्मा लगायत पुगेका छन् ।

साथै अभिनेता हरिवंश आचार्य, किरण केसी, जितु नेपाल, शिव श्रेष्ठ, सन्दीप क्षेत्री लगायतका कलाकारहरू पनि उपस्थित भएर स्मिता र सायुज्यलाई बधाई तथा शुभकामना दिएका छन् ।

स्मिताले ‘मायालु तिमी कता छौ’, ‘कल्लाई था छैन’ जस्ता गीत चर्चितहरू गाएकी छन् ।