शिखर धवनले एनपिएलका बाँकी खेल नखेल्ने, अर्को सिजन खेल्ने इच्छा !

काठमाडौं । भारतीय स्टार व्याटर शिखर धवनले सिद्धार्थ बैंक नेपाल प्रिमियर लिग (एनपिएल)का बाँकी खेल नखेल्ने भएका छन् ।

एनपिएलमा कर्णाली याक्समा आबद्ध धवनले सम्झौता अनुसार बाँकी खेल नखेल्ने भएका हुन् ।

उनले कम्तीमा चार खेल खेल्ने गरी सम्झौता गरेका थिए । सोही अनुसार चौथो खेल उनले शनिवार विराटनगर किंग्ससँग आफ्नो चौथो खेल खेले । यससँगै उनले बाँकी खेल नखेल्ने भएका हुन् ।

एनपिएलमा धवनले कुल १३६ रन बनाए । उनले विराटनगरविरुद्ध ५, काठमाडौं गुर्खाजविरूद्ध नट आउट ७४, दा चितवन राइनोजसँग ४५ रन र जनकपुर बोल्ट्ससँग १४ रन बनाएका थिए ।

धवनले अर्को वर्ष पनि एनपिएल खेल्ने इच्छा व्यक्त गरेका छन् । धवनले आफ्नो घुँडाले साथ दिएमा अर्को सिजन खेल्न आउने बताएका छन् ।

उनले एनपिएलमा नेपाली खेलाडीको प्रदर्शनको पनि प्रशंसा गरेका थिए ।