दुर्गा प्रसाईँको बयान– कम्बोडियामा ओलीको लगानीबारे प्रमाण मैले बनाएको होइन

काठमाडौं । साइबर अपराधको कसुरमा पक्राउ परेका व्यवसायी दुर्गा प्रसाईंले कम्बोडियामा प्रधानमन्त्री केपी शर्मा ओलीको लगानीका आरोपसम्बन्धी कागजात आफूले नबनाएको बताएका छन् ।

उनले उक्त कागजात कम्बोडियामा बस्ने एक नेपालीले आफूलाई पठाएको बयान दिएका हुन् ।

उनले कम्बोडियामा बस्ने एक नेपालीले प्रधानमन्त्री ओलीले लगानी गरेको विषयमा फोनमा बताएको र सोही आधारमा आफूले बोलेको बयान दिएका हुन् ।

प्रसाईंले सरकारी वकिल कार्यालय काठमाडौंले लिएको बयानमा भनेका छन्– ‘एक जना कम्बोडियामा बस्ने नेपालीले मैले प्रयोग गर्दै आएको नेपाली नम्बरमा मलाई फोन सम्पर्क गरेका थिए । खड्गप्रसाद शर्मा ओलीको स्मार्ट एक्जिएटा कम्पनी लिमिटेड कम्बोडियामा लगानी छ भनि जानकारी गराएका थिए । त्यसो भए तपाईसँग के प्रमाण छ भनि उनलाई सोधपुछ गर्दा खड्गप्रसाद शर्मा ओली बिजनेश फोरमका लागि १४ मे, २०१९ मंगलबार कम्बोडियामा जाँदा भाग लिएको अवस्थाको भिडिओ र सो कम्पनीको सेयर खरिद गरेको पैसा खुलेको कागजहरू छ भनेका थिए,’ प्रसाईंले बयानमा भनेका छन्, ‘त्यसो भए सो कागजातहरू मैले प्रयोग गर्ने नेपाली नम्बरको ह्वाट्सएपमा पठाइदेऊ भनेकोमा उनले पठाइदिए । यो प्रमाणहरू मैले बनाएको कागजात, भिडिओ तथा फोटोहरू होइन ।’

प्रसाईंलाई सरकारी वकिल कार्यालयले साढे ७ वर्षसम्मको कैद सजाय माग गर्दै काठमाडौं जिल्ला अदालतमा मुद्दा दायर गरेको छ ।

विद्युतीय कारोबार ऐन,२०६३ अन्तर्गतको कसुरमा प्रसाईं विरुद्ध बुधवार जिल्ला अदालत काठमाडौंमा मुद्धा दर्ता गरिएको जिल्ला सरकारी वकिल कार्यालयले जनाएको छ ।

साइबर ब्युरोले बुझाएको अनुसन्धान प्रतिवेदनको आधारमा जिल्ला सरकारी वकिल कार्यालयले उनी विरुद्ध अभियोगपत्र दायर गरेको हो ।

सरकारी वकिलले उनीबिरुद्ध विद्युतीय कारोबार ऐन,२०६३ को दफा ४७ को अन्तर्गत सजाय हुन मागदावी गरिएको छ । यही मंसिर ४ गते उनी घरबाटै पक्राउ परेका थिए ।

प्रधानमन्त्री केपी शर्मा ओलीविरुद्ध फर्जी कागजात तयार गरेर सामाजिक सञ्जालमा सार्वजनिक गरेपछि उनी पक्राउ परेका हुन् ।

ऐनको परिच्छेद ९ को दफा ४७ मा विद्युतीय स्वरुपमा गैरकानूनी कुरा प्रकाशन गर्नेलाई अधिकतम एक लाख रुपैयाँसम्म जरिवाना,पाँच वर्षसम्म कैद वा दुवै सजाय हुनसक्ने उल्लेख छ ।

यस्तो छ प्रसाईंले दिएको बयान

नेपालमा भइरहेको राजनीतिक अस्थिरता, देशमा मौलाउँदो भ्रष्टाचार, चरम आर्थिक संकट, युवाहरू विदेश पलायन, सामान्य नागरिकले महँगीको मारमा झेल्नु परेको पीडा पीरमर्कालाई बुझी नेपालीहरूको अभिभावकको रूपमा मैले विगत तीन वर्षदेखि राष्ट्र, राष्ट्रियता, धर्म, संस्कृति र नागरिक बचाऊ महाअभियानको रूपमा नेतृत्वदायी भूमिकामा कार्य गर्दै आइरहेको छु ।

सो कार्यहरू गर्नमा अवरोध सिर्जना गर्ने नेपालका वर्तमान संघीय सरकार तथा सरकारको नेतृत्व गर्ने प्रमुख राजनीति दलका नेताहरूलाई चुनौती दिँदै सामाजिक तथा राजनीतिक अभियानहरू चलाइरहेको छु ।

हाल नेपालका सम्माननीय प्रधानमन्त्री खड्गप्रसाद शर्मा ओली ज्यूको बारेमा बारम्बार नेपाली मिडियाहरू लगायत विदेशी मिडियाहरूले समेत ’कम्बोडियाको टेलिकममा प्रधानमन्त्री खड्गप्रसाद ओलीले २१ करोड अमेरिकी लगानी गरेको त्यसको नेपाली अन्दाजी रू. साढे ३२ अर्ब लगानी गरेको भनेको कारण सो मिडियाहरूको समाचारहरूको बारेमा केलाउनुका साथै सो बिषयमा बुझ्दै गर्दा एक जना कम्बोडियामा बस्ने नेपालीले मैले प्रयोग गर्दै आएको नेपाली नम्बरमा मलाई फोन सम्पर्क गरेका थिए ।

खड्गप्रसाद शर्मा ओलीको स्मार्ट एक्जिएटा कम्पनी लिमिटेड कम्बोडियामा लगानी छ भनि जानकारी गराएका थिए। त्यसो भए तपाईसँग के प्रमाण छ भनि उनलाई सोधपुछ गर्दा खड्गप्रसाद शर्मा ओली विजनेस फोरमका लागि १४ मे, २०१९ मंगलबार कम्बोडियामा जाँदा भाग लिएको अवस्थाको भिडिओ र सो कम्पनीको सेयर खरिद गरेको पैसा खुलेको कागजहरू छ भनेका थिए ।

त्यसो भए सो कागजातहरू मैले प्रयोग गर्ने नेपाली नम्बरको ह्वाट्सएपमा पठाइदेउ भनेकोमा उनले पठाइदिए । यो प्रमाणहरू मैले बनाएको कागजात, भिडिओ तथा फोटोहरू होइन ।

गरिब, विकासोन्मुख हाम्रो देशका प्रधानमन्त्रीसँग कम्बोडियामा लगानी गर्ने यत्रो पैसा कहाँबाट आउँछ, न त हाम्रो देशका प्रधानमन्त्री ठूलो व्यापारी, न त ठूलो व्यवसायी, न त ठूलो उद्योगी यत्रो रकम किन, कसरी लगानी गरे भन्ने विषयमा जनतासामु प्रष्ट पारौं भन्ने उद्देश्यले मैले विभिन्न मिडियाका साथीहरूलाई बोलाई प्रेस मिट गरेँ ।

त्यस क्षणमा मैले ‘यहाँका नेताहरूको पैसा कम्बोडिया, मंगोलिया, तुर्किमेनिस्तान, साउथ अफ्रिका, केन्या, दुवई, सिंगापुरमा छ । मसँग प्रमाण छ लिखित सिग्नेचर भएका पेपरहरू छन्, मसँग बुझ्नु भो मलाई यिनीहरूले मारे भने अर्कै कुरो हो नभए दुर्गा प्रसाई बिग्दैन, संसारमा दुर्गा प्रसाईं मर्छ, बिग्दैन ।

संसारमा दुर्गा प्रसाई झुक्छ, तर बिग्दैन किनभने मैले नेपालीहरू रोएको, नेपाली चेलिबेटीहरू रोएको देखेको छु’ भन्ने लगायतको शब्दहरूमा बोल्दै सम्माननीय प्रधानमन्त्री खड्गप्रसाद ओलीले कम्बोडियामा लगानी गर्नु भएको रकम सहितको कागजातहरू देखाएको थिए ।

सोसँग सम्बन्धित विषयमा संवाद गर्दै गर्दाको भिडिओलाई मैले प्रयोग गर्दै आइरहेको सामाजिक सञ्जाल फेसबुकबाट ‘ल हेर्नुहोस् केपी ओलीको कम्बोडियामा लगानी, हालका देशका प्रधानमन्त्रीको असली चरित्र… ….’ भन्ने लगायतको स्टाट्सहरूको साथमा भिडिओ समेत अपलोड/पोष्ट गरेको हुँ ।