एनपीएल : कर्णालीविरुद्ध बलिङ गर्दै सुखद अन्त्यको लक्ष्यमा रहेको लुम्बिनी

काठमाडौं । लुम्बिनी लायन्सले टस जितेर कर्णाली याक्सविरुद्ध पहिले बलिङ गरिरहेको छ । टियु क्रिकेट मैदानमा टस जितेर लुम्बिनीका कप्तान रोहितकुमार पौडेलले बलिङ रोजेका हुन् ।

प्लेअफ होडबाट बाहिरसकेको लुम्बिनी लिगकै अन्तिम खेल खेल्दैछ । कर्णाली भने पाँच खेलबाट ६ अंक जोडेको तालिकाको चौथो स्थानमा छ । प्रतियोगितामा कर्णालीले तीन खेलमा जित र दुईमा हारको नतिजा आत्मसात् गरेको छ ।

कर्णालीले लिगका सुरुआती दुई खेलमा हार व्यहोरेको थियो । त्यसपछिका तीन खेलमा भने कर्णालीले लगातार जित निकालेको छ । कर्णाली पहिलो खेलमा जनकपुर बोल्ट्ससँग आठ विकेटले पराजित भएको थियो । दोस्रो खेलमा कर्णाली काठमाडौं गुर्खाजसँग तीन विकेटले हारेको थियो । त्यसपछि भने कर्णालीले तेस्रो खेलमा चितवन राइनोजविरुद्ध ६ विकेट, चौथो खेलमा विराटनगर किंग्सविरुद्ध सात रन र पाँचौँ खेलमा पोखरा एभेन्जर्सविरुद्ध सात विकेटको जित निकालेको थियो ।

लुम्बिनीले प्रतियोगिताका सुरुआती चार खेलमा लगातार हार व्यहोरेको थियो । रोहितकुमार पौडेलको कप्तानीमा रहेको टोलीले पहिलो खेलमा विराटनगर किंग्ससँग दुई विकेट, दोस्रो खेलमा पोखरा एभेन्जर्ससँग १० विकेट, तेस्रो खेलमा सुदूरपश्चिम रोयल्ससँग ४५ रन र चौथो खेलमा जनकपुर बोल्ट्ससँग एक रनको हार व्यहोरेको थियो । लुम्बिनील पाँचौँ खेलमा चितवन राइनोजविरुद्ध ३३ रनको जित निकालेको थियो । छैटौँ खेलमा लुम्बिनीले काठमाडौं गुर्खाजसँग १८ रनको हार व्यहोरेको थियो ।