पाकिस्तानमाथि नेपालको ऐतिहासिक जित

काठमाडौं । एसिसी यु– १९ महिला एसिया कपमा नेपालले पाकिस्तानलाई पराजित गरेको छ ।

जितका लागि पाकिस्तान यु– १९ ले दिएको १ सय ५ रनको लक्ष्य नेपाल यु–१९ ले १९ ओभरमा चार विकेट गुमाएर पुरा गर्‍यो ।

नेपालको जितमा कप्तान पूजा महतो नायक बनिन् । उनले बलिङ र ब्याटिङबाट टिमलाई जित दिलाइन् ।

पहिलो जितसँगै नेपाल महिला एसिया कपको सुपर फोरमा प्रवेश गरेको छ ।

नेपालको जितमा कप्तान पूजा महतोले सर्वाधिक ४७ रन बनाइन् । उनले ४७ बलमा ४७ रनको कप्तानी पारि खेलिन् । उनले ३ चौका प्रहार गरिन् ।

सोनी पाखरिनले १३ रन बनाइन् । उनले २० बलमा १ चौका प्रहार गर्दै १३ रन बनाएर आउट भइन् ।

साना प्रवीण १० रन बनाउँदै रन आउट भइन् । उनी १५ बलमा १० रन बनाएर खेलिरहेको बेला रन आउट भइन् ।

सावित्री धामीले ८ रनको योगदान दिइन् । उनले १६ बलमा ८ रन बनाइन् ।

सीमाना केसी १२ रनमा नट आउट रहिन् । उनले १२ बलमा १२ रन नै बनाइन् । ज्योत्स्निका मरासिन भने शून्य रनमा आउट भएकी थिइन् ।

लगातारको दोस्रो हारसहित पाकिस्तान प्रतियोगिताबाट बाहिरिएको छ ।

पाकिस्तान पहिलो खेलमा भारतसँग नौ विकेटले पराजित भएको थियो । अब नेपालले मंगलबार भारतसँग भिड्ने छ ।