भक्तपुरमा बुवाले चक्कु हान्दा ३१ वर्षीय छोराको मृत्यु

काठमाडौं । भक्तपुरमा बुवाको चक्कु प्रहारबाट छोराको मृत्यु भएको छ । मंगलबार राति सवा १० बजेतिर भक्तपुर नगरपालिका–२ स्थित सहिद स्मृति खेल मैदान नजिकै बुवाले चक्कु प्रहार गरी छोराको हत्या गरेका हुन् ।

जिल्ला प्रहरी परिसर भक्तपुरका डीएसपी ढुण्डीराज नेउपानेका अनुसार अछामको कमलनगर नगरपालिका–६ हात्तीबाच घर भइ भक्तपुर बस्दै आएका ६३ वर्षीय दीपबहादुर शाहीले चक्कुले हानेर आफ्नै ३१ वर्षीय छोरा नरेन्द्र शाहीको हत्या गरेका हुन् ।

घरायसी विवादमा बुवाले तरकारी काट्ने चक्कुले प्रहार गर्दा गम्भीर घाइते भएका नरेन्द्रलाई उपचारको लागि राति नै भक्तपुर अस्पताल लगिएको थियो । उपचारको क्रममा राति पौने १२ बजे उनको मृत्यु हो ।

घटना लगत्तै मृतकका बुबा दिपबहादुरलाई पक्राउ गरेर कारबाही प्रक्रिया अघि बढाइएको डीएसपी नेउपानेले बताए । मृतकको शव पोष्मार्टमको लागि काठमाडौँ मेडिकल कलेज दुवाकोटमा राखिएको छ ।