शाओमीको साउन्ड आउटडोर स्पिकर नेपालमा सार्वजनिक
मकालु खबर
काठमाडौँ । शाओमीले नेपालमा शाओमी साउन्ड आउटडोर स्पिकर सार्वजनिक गरेको छ । अत्याधुनिक विशेषताहरूले भरिपूर्ण यो स्पिकरले पार्टी आयोजना गर्दा होस् वा एक्लै विश्राम लिँदा होस् यसले शक्तिशाली अडियो, लामो समयसम्मको प्रदर्शन र मजबुत टिकाउपनाको सुनिश्चितता प्रदान गर्ने कम्पनीले बताएको छ ।
शाओमी नेपालका कन्ट्री म्यानेजर मनु मनस्वीले आफ्नो विचार राख्दै भने, ‘हाम्रा ग्राहकहरूको चाहनालाई मध्यनजर गर्दै नवीन, टिकाउ र स्टाइलिस उत्पादन प्रदान गर्ने लक्ष्यका साथ हामीले शाओमी साउन्ड आउटडोर स्पिकर नेपाली बजारमा ल्याएका हौँ । यसको मजबुत विशेषता र किफायती मूल्यले नेपालमा आउटडोर अडियो अनुभवलाई नयाँ परिभाषा दिनेमा हामी ढुक्क रहेका छौँ ।’
कम्पनीका अनुसार शाओमी साउन्ड आउटडोर स्पिकरले प्रतिष्ठित रेड डट डिजाईन अवार्ड जित्न सफल भएको थियो । यो स्पिकर तीन आकर्षक रंगहरू—ब्ल्याक (ओरेन्ज ह्यान्डल), रातो र नीलोमा उपलब्ध रहेको छ । कम्प्याक्ट साइजमा बनेको यो स्पिकरको आकार १९७x६८x६६ मिलिमिटर र तौल भने मात्र ५९७ ग्राम रहेको छ ।
अडियो र कनेक्टिभिटीमा उत्कृष्टता
३० वाटको पावरफुल अडियो आउटपुट र डुअल पासिभ वुफर समावेश रहेको शाओमी साउन्ड आउटडोर स्पिकरले ६० हर्जदेखि २० किलोहर्जसम्मको फ्रिक्वेन्सीमा उत्कृष्ट अडियो अनुभव प्रदान गर्ने कम्पनीले जनाएको छ । ब्लुटुथ ५.४ कनेक्टिभिटीलाई सर्पोट गर्ने यो स्पिकर सजिलै अन्य डिभाइससँग कनेक्ट हुन्छ र कल सपोर्टको सुविधा पनि यसले प्रदान गर्छ । साथै अझै ठूलो अडियो सेटअपको लागि प्रयोगकर्ताहरूले दुई स्पिकरलाई स्टेरियोको रूपमा पेयर गर्न पनि सक्नेछन् वा पार्टी माहोल बनाउन यो स्पिकरलाई १०० वटासम्मका स्पिकरलाई लिंक गर्न सकिने कम्पनीले जनाएको छ ।
टिकाउपन र ब्याट्री लाइफ
विशेषगरी आउटडोर प्रेमीहरूका लागि डिजाइन गरिएको र आइपि ६७ रेटिंग पाएको शाओमी साउन्ड आउटडोर स्पिकर धूलो र पानी प्रतिरोधी पनि रहेको कम्पनीले जनाएको छ । लामो समयसम्म चल्ने यसको ब्याट्रीले एक पटकको चार्जमा १२ घण्टासम्म प्लेब्याक प्रदान गर्दछ । साथै यो केवल २.५ घण्टामा पूर्ण रूपमा चार्ज हुने यो स्पिकरले लामो यात्रामा पनि अविरल मनोरञ्जन सुनिश्चित गर्ने कम्पनीले जनाएको छ ।
मूल्य तथा बजार उपलब्धता
शाओमी साउन्ड आउटडोर स्पिकरको मूल्य रु. ६,२९९ रहेको छ जुन नेपालभरका आधिकारिक एमआई स्टोर र शाओमीका आधिकारिक रिटेलरहरूमा उपलब्ध रहेको कम्पनीले जनाएको छ ।
मकालु खबर
