दाङमा बाइक अनियन्त्रित भएर पल्टिदा पछाडि सवार खत्रीको मृत्यु

काठमाडौं । दाङको तुलसीपुरमा मोटरसाइकल दुर्घटनामा परी एकजनाको मृत्यु भएको छ । आइतबार भएको दुर्घटनामा मोटरसाइकलमा सवार परिवर्तन गाउँपालिका-२ रोल्पाका ३१ वर्षीय दिलप्रसाद खत्रीको मृत्यु भएको हो ।

राप्ती राजमार्ग अन्तर्गत तुलसीपुरबाट जसपुरतर्फ जाँदै गरेको रा ३ प ६४९३ नम्बरको मोटरसाइकल आइतबार अपराह्न तुलसीपुर उपमहानगरपालिका-१२ टरिगाउँमा अनियन्त्रित भई पल्टिएको थियो । दुर्घटनामा घाइते खत्रीको उपचारका क्रममा आइतबार राति नेपालगन्ज मेडिकल कलेज कोहलपुरमा मृत्यु भएको इलाका प्रहरी कार्यालय तुलसीपुरका सूचना अधिकारी प्रहरी निरीक्षक प्रकाश थापाले जानकारी दिए ।

दुर्घटनामा मोटरसाइकल चालक तुलसीपुर–११ का ३१ वर्षीय पंकज खत्री गम्भीर घाइते भएका छन् । उनको मेडिकल कलेज कोहलपुरमा उपचार भइरहेको छ ।