भीम रावल साधारण सदस्य समेत नरहने गरि एमालेबाट निस्कासित

काठमाडौं । नेकपा एमालेले नेता भीम रावललाई पार्टीबाट निस्कासन गरेको छ । आज बसेको सचिवालय बैठकले नेता रावललाई साधारण सदस्य समेत नरहने गरि निस्कासित गरेको हो ।

पूर्व उपाध्यक्ष समेत रहेका रावललाई पार्टी हित विपरीतका कार्य गरेको भन्दै एमालेले साधारण सदस्यबाट हटाउने निर्णय गरेको हो ।

व्यवसायी मीनबहादुर गुरुङबाट जग्गा दान लिएर पार्टी कार्यालय बनाउने विषयमा असहमति जनाएपछि उनलाई पार्टीबाट हटाइएको हो ।

उपमहासचिव प्रदीप ज्ञवालीले रावलले निरन्तर पार्टी हित विपरीत अभिव्यक्ति दिँदै आएको र स्पष्टीकरण सोध्दा पनि चित्त बुझ्दो जवाफ नदिएपछि पार्टीबाट हटाइएको जानकारी दिए ।

यस्तै नेकपा एमालेले स्थायी कमिटी सदस्य डा. विन्दा पाण्डे र केन्द्रीय सदस्य उषा किरण तिमल्सेनालाई ६ महिना जिम्मेवारीबाट हटाएको छ ।

उनीहरूले पार्टी कार्यालय निर्माणका विषयमा असहमति जनाएका थिए ।