एमालेबाट यसकारण निकालिए रावल,अब के गर्लान् ? [भिडिओ]

काठमाडौं । नेकपा एमालेले डा.भीम रावललाई पार्टीको संगठित सदस्यताबाट निष्काशन गरेको छ । बुधवार बसेको केन्द्रीय सचिवालय बैठकले पूर्व उपाध्यक्ष समेत रहेका रावललाई पार्टीको संगठित सदस्यताबाट निष्काशन गरेको हो ।

नेकपा एमालेका उपमहासचिव प्रदीप ज्ञवालीका अनुसार पार्टी हितविपरित अभिव्यक्ति दिँदै हिँडेपछि उनलाई पार्टीको संगठित सदस्यताबाट निष्काशन गरिएको हो ।

‘महाधिबेशनमा अध्यक्षमा उम्मेदवार हुनुभयो,उपाध्यक्षमा आग्रह गरिएको कुरालाई उहाँले मान्नुभएन । त्यसपछि केन्द्रीय सदस्यमा पनि नआएपछि हाम्रो बैधानिक व्यवस्थाअनुसार सल्लाहकारमा रहनुभयो । त्यो सल्लाहकारको जिम्मेवारी पनि उहाँले पुरा गर्नुभएन । अभिव्यक्तिहरु पनि पार्टीलाई बलियो बनाउने भन्दा पनि कमजोर बनाउने हिसाबले आएको हुनाले उहाँलाई पार्टीको संगठित सदस्यताबाट मुक्त गर्ने निर्णय गरिएको छ,’बैठकका निर्णय सुनाउँदै उपमहासचिव ज्ञवालीले भने।

• भीम रावल साधारण सदस्य समेत नरहने गरि एमालेबाट निस्कासित

रावल १० औँ महाधिवेशनमा केपी शर्मा ओलीससंग अध्यक्ष पदमा चुवाव लेडेका थिए । उक्त चुनावमा उनी पराजित भएका थिए । नेकपा एमालेबाट निष्काशित भएसंगै अब डा.रावल के गर्लान् भन्ने चासोको विषय बनेको छ ।

पछिल्लो समय उनी माधव कुमार नेपाल नेतृत्वको नेकपा एकीकृत समाजवादीमा जान सक्ने समेत चर्चा सुनिन्छ । तर, नेकपा एकीकृत समाजवादीमा प्रवेश गर्लान् वा के गर्लान् भन्ने चासोको विषय छ ।

यस्तै नेकपा एमालेले स्थायी कमिटी सदस्य डा.विन्दा पाण्डे र केन्द्रीय सदस्य उषा किरण तिमल्सेनालाई ६ महिना जिम्मेवारीबाट हटाएको छ ।

पार्टीको भवन निर्माणको सन्दर्भमा विधानभन्दा बाहिर गएर अभिव्यक्ति दिएको भन्दै दुवैजनामध्ये पाण्डेलाई स्थायी कमिटीबाट र तिमल्सिनालाई केन्द्रिय कमिटीबाट ६ महिनाका लागि निलम्बित गरिएको ज्ञवालीले बताए ।