भारतीय पक्षले शुक्लाफाँटामा १ हजार बिघा जमिन अतिक्रमण गरेको झलनाथको रिपोर्ट

काठमाडौं । पूर्वप्रधानमन्त्री तथा नेकपा एकीकृत समाजवादीका सम्मानित नेता झलनाथ खनालले कञ्चनपुरको दक्षिणी सिमाना नजिकको १ हजार बिघा जमिन भारतीय पक्षले कब्जा गरेको विषयमा सरकारलाई गम्भीर कदम चाल्न आग्रह गरेका छन् ।

खनालले बिहीबार एक विज्ञप्ति जारी गर्दै कञ्चनपुरको सीमा स्तम्भ २७ र २८ को बीचमा पर्ने करिब ६६७ हेक्टर जमिन भारतीय पक्षले कब्जा गरेर खेतीपाती गरिरहेको कुरा सार्वजनिक गरेका हुन् । उक्त क्षेत्र नेपालको भूभाग भएको र भारतीय अतिक्रमण स्वीकार्य नहुने खनालको भनाइ छ ।

खनालले अतिक्रमण क्षेत्रको यथार्थ स्थिति पत्ता लगाउन तत्काल प्रभावकारी निरीक्षण टोली खटाउन सरकारसँग माग गरेका छन् । खनालको विज्ञप्तिमा भनिएको छ, ‘नेपालको भूमिमा भइरहेको अतिक्रमणको सामना गर्न सरकारलाई तदारुकता देखाउन आग्रह गर्दछु। यो मुद्दा हाम्रो राष्ट्रिय स्वाभिमान र सिमाको सुरक्षासँग प्रत्यक्ष जोडिएको छ । कुनै पनि ढिलाइले नेपालको सार्वभौमिकता र भौगोलिक अखण्डतालाई हानी पुर्याउन सक्छ ।’

खनालले सिमानामा भइरहेको भारतीय अतिक्रमणले दुई देशबीचको सीमा विवादलाई थप जटिल बनाउने चेतावनी पनि दिएका छन् । उनले सिमाना क्षेत्रमा रहेका स्थानीय जनताको सुरक्षामा खतरा उत्पन्न हुन सक्ने भन्दै भारतसँगको वार्ता तत्काल सुरु गर्न सरकारलाई दबाब दिएका हुन् ।