कन्दरा ब्याण्डको सांगितिक प्रस्तुती जनवरी १८ मा हुने

काठमाडौं । एफ सेभेन इन्टरनेशनलको आयोजनामा दुवईमा हुने कन्दरा ब्याण्डको सांगीतिक कार्यक्रमको मिति परिवर्तन गरिएको छ । जनवरी ११ तारिख दुबईस्थित क्लब एसकेसेभेनर १२ तारिख अबुधबीमा हुने भनिएको कन्दरा ब्याण्डको सांगीतिक कार्यक्रम तोकिएको मितीमा नहुने भएको हो ।

कन्दरा ब्याण्डले शुक्रवार प्रेस विज्ञप्ति जारी यसबारेमा जानकारी दिनुका साथै सांगितिक कार्यक्रमको नयाँ मिति समेत तय गरेको छ । अब कन्दराको सांगीतिक प्रस्तुती युबीओसी हस्पिटालिटी (UBOC Hospitality ) को आयोजनामा यही जनवरी १८ तारिखमा बुर दुबई युएईको क्लब एसके सेभेनमा हुने छ ।

‘विश्व भ्रमणका क्रममा कन्दराले तय गरेका विश्वसनीयता तथा कार्यक्रमको स्तर सम्बन्धी मापदण्डमा कुनै सम्झौता नगर्ने हाम्रो नीति र अडान हो। साथै कार्यक्रम नजिकिँदै जाँदा आयोजकले कार्यक्रमको पूर्ण तयारी सम्बन्धमा आश्वस्त नगरेमा कार्यक्रम रद्द अथवा स्थगित हुने अग्रीम जानकारी गराए अनुसार नै दुबईको कार्यक्रम रद्द भएको हो,’जारी प्रेस विज्ञप्तिमा भनिएको छ ।

साथै दोहा कतारमा भने पूर्व निर्धारीत मिती र स्थान (जनवरी १७, प्लानेट लञ्ज एण्ड क्लब, भिआइपी होटल) मा कन्दराको सांगीतिक प्रस्तुती हुनेछ।

विश्वलाई नेपाली संगीतको स्तर र अनुभवको स्वाद पस्किने सवालमा कन्दराले सम्झौता नगर्ने समेत जारी प्रेस विज्ञप्तिमा उल्लेख छ । शुभचिन्तक तथा दर्शकहरूलाई परेको असुविधाप्रति कन्दरा व्याण्डले क्षमा समेत मागेको छ ।

आफ्नो सांगीतिक यात्राको गौरवपूर्ण ३२ वर्षे इतिहासलाई विश्वभर छरिएर रहेका नेपालीहरुबीच पुगेर उत्सवको रुपमा मनाउने घोषणा गरे लगत्तै विशवका धेरै मुलुकहरुबाट कार्यक्रम आयोजनार्थ जिज्ञासा आउन थालेका थिए।