धनी मानिसलाई लगानी गर्न दियो भने मात्रै त्यो देश धनी हुन्छ : बद्रीप्रसाद पाण्डे

काठमाडौँ । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले सरकारले ल्याएको अध्यादेशले लगानीको वातावरणलाई सहज बनाएको बताएका छन् ।

शनिवार बागलुङमा इला कम्फोर्ट होटलको शुभारम्भ गर्दै उनले यस्तो बताएका हुन् । उनले निजी क्षेत्रलाई आकर्षित नगरी देश बन्न नसक्ने बताउँदै उनले पुँजीपतीहरुलाई गलत भाष्यद्वारा नराम्रो बनाइएको बताए । धनी मानिसलाई लगानी गर्नका लागि वातावरण दिनुपर्ने र सरकारले अहिले लगानी सहजताको लागि काम गरिरहेको बताए ।

मन्त्री पाण्डेले काँग्रेस र एमाले दुई ठूला एक ठाउँमा आएको बेलामा लगानी ढुक्क भएर गर्न आग्रह गरे । अस्थिर राजनीतिका कारण धेरै पछौटेपन भोग्नुपरेकाले मजबुत सहकार्य गरेर अघि बढिरहेको बताए । सरकार सुशासनको प्रत्याभूति दिने, राजनीतिक स्थिरता, लगानी भित्र्याउने वातावरण बनाउने दिशामा अघि बढिरहेको बताए ।

मन्त्री पाण्डेले भने ‘अध्यादेशले लगानीको वातावरणलाई सहज बनाउनेछ । निजी क्षेत्रलाई हामीले आकर्षित नगरीकन कुनै उपाय नै छैन । हाम्रो देशको गलत भाष्य भनेको, लगानी कर्ता भनेको, पुँजीपति भनेको पुँजी लगानीका लागि हिम्मत, आँट र प्रयत्न गर्नेहरुकाप्रति केही नेगेटिभ भाष्य बनेको थियो, यसलाई हामी चिर्दै जानेछौँ । धनी मानिसलाई लगानी गर्नका लागि वातावरण दिनुपर्छ । दियो भने मात्रै त्यो देश धनी हुन्छ । धनीलाई पुँजी लगानी गर्ने वातावरण दिने हो । धनीले कर छली नगरोस्, राज्यलाई बुझाउनुपर्ने कर बुझाओस् । श्रम शोषण नगरोस् र उपभोक्तालाई ठगी नगरोस् भन्ने वातावरण बनाउनु पर्छ ।’

कार्यक्रममा बोल्दै नेपाली काँग्रेसका सांसद जीवन परियारले अहिले सरकारले ल्याएका अध्यादेशहरू निजी क्षेत्रलाई प्रवर्द्धन गर्नेगरी आएको बताए । उनले उद्यम व्यवसायलाई सरकारले सफल बनाउने गरी अध्यादेश ल्याएको बताए ।

उनले भने ‘अहिले आइरहेका जति पनि अध्यादेशहरू छन्, त्यो अध्यादेशहरूमा विशेष गरी निजी क्षेत्रलाई प्रमोट गर्नेगरी, उद्यम व्यवसायलाई सफल बनाउने गरी ती अध्यादेश आएका छन् भन्नेकुरामा कुनै दुईमत छैन । नेपालमा पर्यटन क्षेत्रको राम्रो सम्भावना छ ।’

बागलुङमा सञ्चालनमा आएको इला कम्फोर्ट होटलमा काली गण्डकी कोरिडोर तथा मध्य पहाडी लोक मार्ग हुँदै गण्डकी क्षेत्र तथा बागलुङका पर्यटकीय स्थल भ्रमण गर्ने पर्यटक तथा अन्य पाहुनाहरूका लागि गुणस्तरीय सेवा सुविधा उपलब्ध हुने आइएमई ग्रुपको भनाइ छ ।

आइएमई ग्रुपको लगानीमा बागलुङ बजारमा सञ्चालनमा आएको इला कम्फोर्ट लक्जरी होटल करिब ३० करोड रुपैयाँको लगानीमा निर्माण गरिएको हो । होटलले बागलुङमा स्तरीय आवासको लागि नयाँ मानक स्थापित गर्ने विश्वास लिइएको छ । लगभग ४ रोपनी जग्गामा फैलिएको, इला कम्फोर्ट बागलुङमा २७ अतिथि कक्ष, दुई सुन्दर सुइटहरू र एक विशेष पेन्ट हाउस सहित ३० वटा आकर्षक ढंगले डिजाइन गरिएका कोठाहरू छन् ।