उपाधि घरमै राख्ने लक्ष्यसहित मैदान उत्रिँदै नेपाल, साम्बाले पहिलो खेल गुमाउने सम्भावना
मकालु खबर
काठमाडौं । अन्तर्राष्ट्रिय महिला फुटबल प्रतियोगिता आजबाट काठमाडौँमा सुरु हुँदैछ । एएफसी महिला एसियन कप र फिफा विश्वकप लक्षित प्रतियोगिता आजबाट फागुन १४ सम्म त्रिपुरेश्वरस्थित दशरथ रंगशालामा हुँदैछ ।
आज हुने दुई वटा खेल मध्ये पहिलो खेलमा म्यानमार र लेबनानले प्रतिस्पर्धा गर्नेछन् भने जुन खेल अपराह्न १ः३० बजेबाट सुरु हुनेछ । आजै हुने दोस्रो खेलमा नेपालले किर्गिस्तानसँग भिड्नेछ, जुन खेल साँझ ५ः३० बजेबाट सुरु हुनेछ । च्याम्पियनसिप घरमै राख्ने लक्ष्यसहित मैदान उत्रिँदैछ ।
फिफा वरीयतामा किर्गिस्तान नेपालभन्दा तल छ । हाल किर्गिस्तानको फिफा वरीयता १२८ औं स्थान छ । किर्गिस्तानसँग नेपालले अहिलेसम्म १ खेल खेलेको छ । सन् २०१९ किर्गिस्तानमै भएको नादेज्दा कपमा नेपालले ८(२ को फराकिलो जित दर्ता गरेको थियो ।
खेलअघि हिजो आयोजित पत्रकार सम्मेलनमा नेपाली टोलीका कप्तान तथा गोलकिपर अञ्जिला तुम्बापो सुब्बादेले भने यो खेलको उपाधिको खडेरी तोड्नका यो प्रतियोगिता राम्रो अवसर भएको बताएकी थिइन । ‘तयारी राम्रो भएको छ । टोलीको तालमेल मिलिरहेको छ । कम गल्ती गर्दै उपाधि जित्ने लक्ष्यका साथ मैदान उत्रिने छौं । कोचको योजनाअनुसार प्रदर्शन गर्न सके उपाधि जित्न गाह्रो पनि छैन,’ उनले भनिन् ।
सावित्राले पहिलो खेल गुमाउने सम्भावना
स्टार स्टाइकर सावित्रा भण्डारी ‘साम्बा’ सोमबार स्वदेश आइपुग्नेछिन् । उनी एअर इन्डियामार्फत स्वदेश फर्किने अखिल नेपाल फुटबल संघ (एन्फा)ले जनाएको छ ।
लामो यात्रा गर्नुपर्ने भएको कारण साम्बाले पहिलो खेल गुमाउने सम्भावना रहेको मुख्य प्रशिक्षक राजेन्द्र तामाङले बताए । ‘साम्बा ढिला आइपुग्ने भएको हो । सो उसले पहिलो खेलमा रेस गर्छ होला,’ उनले भने।
नेपाली राष्ट्रिय महिला टोलीको जर्सीबाट सर्वाधिक ५५ गोल गरिसकेकी साम्बा पछिल्लो समय फ्रान्समा व्यवसायीक फुटबल खेलिरहेकी छन् ।
मकालु खबर
