मौलिक गीत गाएर भाइरल थिइन् राधिका, बिरामी भएको दुई दिनमै छाडिन् संसार

काठमाडौं । सामाजिक सञ्जालमा मौलिक गीत गाएर भाइरल भएकी राधिका बादीको निधन भएको छ ।

४२ वर्षीय राधिकाको आइतबार बिहान कालिकोटको थिरपुमा निधन भएको हो । उनी केही दिनदेखि सामान्य बिरामी थिइन् । उनी अस्पताल जान नपाउँदै र रोग पत्ता लाग्न नपाउँदै उनको निधन भएको हो ।

भाइरल राधिकाको निधन भएको जिल्ला प्रहरी कार्यालय कालिकोटका प्रमुख डिएसपी टेक बहादुर रावतले पुष्टि गरे ।

‘राधिका पछिल्लो दुई दिनदेखि बिरामी थिइन्, आइतबार बिहान उनको मृत्यु भएको खबर पायौँ,’ उनले भने ।

राधिका बादी र उनका श्रीमान् जोगेन्द्र बादी बाजुराको बडिमालिका नगरपालिका–२ का बासिन्दा हुन् । यो जोडी मौलिक लोकगीत गाएर जीविकोपार्जन गर्दै आएको थियो । विशेष गरी राधिकाको मादल बजाउने कला र समधुर स्वरमा गाउने मौलिक गीत उत्कृष्ट मानिन्थ्यो, जसले सामाजिक सञ्जालमा धेरैको मन जितेको थियो ।

उनले मादल बजाएर ‘नशा नशामा रगत रगतमा..’ बोलको गीत गाएको भिडियो भाइरल बनेको थियो । राधिकाको निधनको खबरले कला प्रेमीहरू शोकमा डुबेका छन् ।

सामाजिक सञ्जालमा उनले गाएका गीत तथा भिडियोहरू अझै पनि चर्चामा छन् । राधिकाको पहिलो घर बझाङमा भए पनि जोगेन्द्रसँग दोस्रो विवाहपछि उनी बाजुरामा बस्दै आएकी थिइन् ।