इलामका मानबहादुरको सांसद शर्माले निःशुल्क उपचार गरिदिने

काठमाडौं । इलामका ६१ वर्षीय मान बहादुर खड्काको नेपाली कांग्रेसका सांसद डा. सुनिल शर्माले निःशुल्क उपचार गरिदिने भएका छन् ।

इलामको सूर्योदय नगरपालिका–९ का ६१ वर्षीय खड्का बिरामले थलिएका थिए । उनको आर्थिक अभावका कारण उपचार हुन सकेको थिएन ।

आर्थिक अभावका कारण उपचार नपाएको थाहा पाएपछि इलामका प्रदेश सांसद समसेर राईले उनको उपचारको लागि पहल गरे ।

आफ्नै निर्वाचन क्षेत्रका नागरिक उपचार नपाएर दुःख भोगिरहेको थाहा पाएपछि सांसद राई खड्काकै घरमा पुगेर उनको अवस्थाबारे जानकारी लिए । उनले बिरामीको अवस्था कांग्रेस सांसद डा. सुनिल शर्मालाई जानकारी गराए ।

बिरामी खड्काको अवस्था थाहा पाएपछि सांसद शर्माले काठमाडौं मेडिकल कलेजमा ल्याउन आग्रह गरेका थिए । उनले आफूले निःशुल्क उपचारको व्यवस्था गरिदिने घोषणा गरे ।

सांसद शर्माको आग्रहपछि प्रदेश सांसद राईको पहलमा बिरामीलाई काठमाडौं मेडिकल कलेजमा भर्ना गरेर उपचार प्रक्रिया सुरु गरिएको छ ।

डा. सुनिल शर्मा नेतृत्वको काठमाडौं मेडिकल कलेजले देशका ग्रामीण तथा दुर्गम भेगका जनताहरूलाई लक्षित गरी निरन्तर निःशुल्क स्वास्थ्य शिविरहरू सञ्चालन गर्दै आइरहेको छ ।