कुलमानको बर्खास्तीपछि रविको मौनता तोडियो- ‘अन्तिम निर्णय जनताले लिन्छन्’

काठमाडौं । नेपाल विद्युत् प्राधिकरणका कार्यकारी निर्देशक कुलमान घिसिङको बर्खास्तीप्रति चौतर्फी प्रतिक्रिया आइरहेका छन् । सरकारले सोमबार साँझ मन्त्रिपरिषद् बैठकमार्फत घिसिङलाई पदमुक्त गर्दै हितेन्द्रदेव शाक्यलाई नयाँ कार्यकारी निर्देशक नियुक्त गरेको छ ।

यस निर्णयपछि सामाजिक सञ्जालमा विरोध चर्किएको छ । यस्तै, पाँच महिनादेखि सामाजिक सञ्जालमा मौन रहेका राष्ट्रिय स्वतन्त्र पार्टी (रास्वपा) का सभापति रवि लामिछानेसमेत फेसबुकमा देखिएका छन् । सोमबार मध्यराति उनले फेसबुक लाइभमार्फत मौन तर सन्देशमूलक प्रस्तुति दिएका छन् ।

१ मिनेट २२ सेकेन्डको लाइभ भिडिओमा उनले कुनै शब्द उच्चारण गरेका छैनन्, तर अँध्यारो कोठामा बसेर सलाई कोर्दै मैनबत्ती बाल्ने दृश्य देखाइएको छ । भिडिओको क्याप्सनमा उनले लेखेका छन्, ‘कसलाई राख्ने, कसलाई हटाउने भन्ने अन्तिम निर्णय त जनताले लिन्छन् ।’

रवि लामिछाने गत कात्तिक २ गते सहकारी ठगी प्रकरणमा पक्राउ परेपछि सामाजिक सञ्जालबाट टाढा रहेका थिए । अन्तिम पटक उनले अक्टोबर १८ मा ‘सरकार मर्‍यो, हामीलाई जुठो पर्‍यो’ शीर्षकमा स्टाटस लेखेका थिए ।

पोखराको सूर्यदर्शन सहकारी ठगी मुद्दामा अदालतको आदेशपछि ६५ लाख रुपैयाँ धरौटी बुझाएर गत पुस २५ गते थुनामुक्त भए पनि उनले कुनै पोस्ट गरेका थिएनन् । तर कुलमान घिसिङको हटाइएपछि लामिछानेको यो मौनता भंग भएको छ, जसलाई धेरैले राजनीतिक संकेतको रूपमा हेरिरहेका छन् ।